هو إيه اللي ممكن يحصل في مصر لما 12 ألف مصنع مغلق يرجعوا يشتغلوا تاني؟ تخيل كمية الإنتاج اللي ممكن تضيفها المصانع دي لاقتصاد بلدنا!.. طب إحنا ليه بنستورد حاجات كتير جدًا رغم إن عندنا مصانع كانت بتعمل نفس المنتجات؟ وهل ممكن بجد نلاقي فرص شغل جديدة لكل الشباب اللي بيدور على فرصة؟.. في الفيديو ده هنتكلم عن واحدة من أكبر الخطط اللي الدولة شغالة عليها لإنقاذ الصناعة الوطنية، وتحقيق طفرة كبيرة في الإنتاج والتشغيل.. خطة إحياء 12 ألف مصنع مغلق.
الحكومة أعلنت مؤخرًا عن خطة محكمة لإعادة تشغيل 12 ألف مصنع كانوا متوقفين تمامًا عن العمل.. المصانع دي كانت يوم من الأيام مصدر إنتاج ضخم في مجالات كتير زي الصناعات الغذائية، النسيج، البلاستيك، وحتى المعدات الثقيلة.. لكن بمرور الوقت، لأسباب كتير زي نقص التمويل أو تحديات السوق المصانع دي اتقفلت وده أثر بشكل كبير على حركة الصناعة في البلد
طب ليه إعادة تشغيل المصانع دي مهم؟
أولًا زيادة الإنتاج المحلي.. يعني بدل ما نستورد كل حاجة من برة زي الملابس أو المنتجات البلاستيكية نقدر نصنعها هنا بجودة كويسة وبسعر أرخص.. وده مش بس هيقلل الاعتماد على الاستيراد لكن كمان هيخفف الضغط على العملة الصعبة
ثانيًا تشغيل العمالة.. إعادة تشغيل المصانع دي معناها فرص عمل جديدة لآلاف الشباب.. كل مصنع محتاج مهندسين، عمال، إداريين، ومسؤولين عن التسويق، يعني فرص حقيقية لكل الفئات.. وتخيل معايا لما يكون في شاب أو شابة كانوا بيدوروا على شغل بقالهم شهور أو حتى سنين، ولقوا فرصتهم في مصنع قريب من بيتهم.. ده مش مجرد وظيفة ده أمل جديد ومستقبل أفضل.
طب ايه الدعم اللى بتقدمه الدولة لاعادة تشغيل ال 12 الف مصنع ؟
الدولة مش بتعيد تشغيل المصانع دي كده وخلاص، ده في خطة متكاملة بتشمل توفير تمويل بفوائد منخفضة ولو مصنع محتاج صيانة أو تطوير في المعدات الدولة بتساعد بمبالغ مالية بفوائد تنافسية.. وكان الدولة بتحل مشاكل الأراضي والمرافق ولو في مصانع كانت متوقفة بسبب مشاكل في الكهربا أو الميه أو التراخيص لدولة بتتدخل لحل الحاجات دي.. كمان الدولة بتشجع الابتكار والإنتاج التنافسي من خلال دعم المصانع اللي تقدر تصنع منتجات بجودة تضاهي العالمية عشان نقدر نصدرها كمان مش بس نغطي احتياجاتنا المحلية.
وايه تأثير خطة احياء ال 12 الف مصنع على الاقتصاد؟
عودة 12 ألف مصنع للسوق هتخلق حركة اقتصادية ضخمة وهيكون فيه زيادة فى الصادرات ولما المصانع تنتج كميات كبيرة وبجودة عالية، هنقدر نصدرها لدول كتير حوالينا، وده معناه دخل إضافي للبلد.. كمان تنشيط السوق المحلي .. المستهلك المصري هيلاقي المنتجات اللي كان بيستوردها متوفرة محليًا بسعر أقل وبنفس الجودة.. وكمان تحقيق اكتفاء ذاتي من سلع بعينها وفي وقت الأزمات العالمية وجود مصانع محلية قوية بيحمينا من نقص السلع.
خلاصة الكلام .. الخطة دي مش مجرد مشروع اقتصادي دي خطوة نحو استعادة ريادة مصر الصناعية.. لما المصانع دي ترجع تشتغل هنلاقي إنتاج أكتر، فرص عمل أكتر واعتماد أقل على الاستيراد.. وده في الآخر هيكون ليه تأثير إيجابي على حياة كل واحد فينا
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
