يا ترى فلوس صفقة رأس الحكمة راحت فين؟ والدولة صرفت المليارات اللى دخلت البلد على إيه؟ وهل عرفنا نستفيد منها بالشكل الأمثل ولا ضاعت زي فرص كنتير ضاعت مننا قبل كده؟
وزير المالية أحمد كجوك أدلى بتصريحات مهمة فى الساعات الأخيرة أكد فيها ان الحكومة شغالة على خطة محكمة لخفض معدلات الدين والتضخم.. وده كله من أجل إزاحة "السحابة السوداء" اللي بتخفي الإنجازات الاقتصادية اللي بتحصل في البلد.. وده لأن فيه حاجات ضخمة بتحصل في الاقتصاد المصري بس للأسف مش دايمًا بيكون في وضوح كامل عنها.
كجوك اتكلم كمان عن "صفقة رأس الحكمة" وقال ان كان ليها دور مهم في تحسين الاقتصاد.. رغم كل التحديات الاقتصادية اللي بنواجهها.. والفلوس اللي خرجت منها أسهمت في رفع احتياطي النقد الأجنبي بشكل ملحوظ.. كمان ساعدت في تقليل دين الدولة ليصبح 89% من الناتج المحلي وفي نفس الوقت الدين الخارجي انخفض بنحو 3 مليار دولار.
طب إزاي فلوس رأس الحكمة اتوزعت؟
أموال "رأس الحكمة" اتوجهت لمجموعة من المشاريع في مجالات متنوعة.. ومن أهم القطاعات اللي اتوجهت ليها الفلوس هي السياحة.. الحكومة كانت حريصة على تحسين البنية التحتية في المنطقة.. وده شمل بناء فنادق ومنتجعات سياحية ضخمة بالإضافة لتطوير المرافق العامة زي الطرق والكهرباء.. وفيه عدد كبير من المشاريع السياحية الجارية زي المنتجع السياحي الكبير في رأس الحكمة واللي كان المفروض يحول المنطقة لمقصد سياحي عالمي.
وعلشان رأس الحكمة تبقى وجهة سياحية جاذبة كان لازم يكون فيه تحسينات على شبكة النقل.. و ده خلا الحكومة تصرف أموال كبيرة في إنشاء طرق جديدة وتوسيع شبكة السكك الحديدية.. وكمان تطوير الموانئ البحرية لتستقبل السياح المحليين والدوليين و الفلوس دي كانت هامة علشان تسهيل الوصول للمنطقة.
ولأن مفيش تنمية من غير البنية التحتية للطاقة. رأس الحكمة شهدت استثمارات ضخمة في إنشاء محطات كهرباء جديدة وتطوير شبكات المياه والصرف الصحي. القطاع ده كان بيخدم مش بس رأس الحكمة، لكن كمان المناطق المحيطة اللي ممكن تكون جزء من خطة التنمية الأكبر.
الحكومة كمان وضعت خطط لزيادة الرقعة الزراعية في المنطقة من خلال المشروعات الزراعية المستدامة اللي بتعتمد على تكنولوجيا الري الحديثة.. والاستثمار في هذا القطاع كان ليه تأثير إيجابي على الاقتصاد المحلي في المنطقة، وساهم في توفير فرص عمل جديدة.
أما عن الاستثمارات، فالحكومة مش بتعتمد بس على الاستثمار الحكومي لكن كمان في خطط لزيادة الاستثمارات الخاصة.. اللى ارتفعت نسبتها لـ 63% من إجمالي الاستثمارات عشان يبقى فيه توازن بين القطاعين العام والخاص وده معناه مشاريع ضخمة في الطريق، ومنها 17 مشروعًا في الشراكة مع القطاع الخاص.
يعني باختصار، الفلوس اللي جت من صفقة رأس الحكمة مفيش شك إنها اتوجهت لقطاعات حساسة بتساعد في تقوية الاقتصاد المصري. بس زي أي خطة مش كل حاجة هتتم بين يوم وليلة، ولكن مع الاستمرار في تنفيذ السياسات دي المستقبل بقى فيه أمل كبير في التحسن.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
