يا ترى إيه سر اهتمام العالم بمصر كقبلة استثمارية جديدة، وإيه هي المحفزات اللي بتقدمها الحكومة للشركات العالمية عشان تيجي تشتغل في السوق المصري، وهل حصلت بوادر بتأكد إن مناخ الاستثمار في مصر بيتعافى وبيقدر يوقف على رجله من تاني.
دلوقتي الحكومة المصرية بتقدم كل التسهيلات على المستثمرين الأجانب والعرب وكمان المستثمرين المحليين، عشان تقدر تجذب أكبر عدد منهم وتحول مصر لأكبر قبلة عالمية للاستثمار.
والكلام ده ظهر في صفقات كبيرة زي صفقة رأس الحكومة وكمان صفقة رأس جميلة، ومؤخرا اتجسدت مجهودات الحكومة في شركات عالمية جاية تقتحم السوق المصري من أوسع أبوابه، ومن بين الشركات دي هي شركة "هوتاماكي إيجيبت"، وهي شركة فنلندية مقرها الرئيسي في فنلندا، وأسهمها مقيدة ببورصة "هلسنكي"، وجاية مصر تعمل مصنع لإنتاج وتوزيع وبيع العبوات بجميع أنواعها.
و"هوتاماكي إيجيبت" حصلت على موافقة مجلس الوزراء على منح الرخصة الذهبية لها، عشان تقدر تعمل كل شغلها في مصر بكل سهولة وبعيدا عن الروتين وفوت علينا بكره، وهتبدأ تنفذ مشروعها في مدينة السادات في محافظة المنوفية.
أما بقى مشروع إنتاج وتوزيع العبوات، فهيكون على مساحة 21.7 ألف متر مربع، والعبوات دي هتكون من الألياف الخشنة والناعمة وهيخصص 70% من الإنتاج للتصدير.
والمشروع ده مش بسيط، ده مهم جدا، وأهميته بتتمثل قي إنه هيغذي السوق المحلي بمنتجات من الصناعة المصرية، وكمان هيعمق توطين التصنيع وهيوظف آلاف من العمالة، بجانب نقل التقنيات والتكنولوجيا المتطورة من فنلندا لمصر.
كمان، شركة هوتاماكى ايجيب، هتنتج العبوات بمختلف الأحجام والأشكال، زي عبوات الفاكهة وعبوات البيض الورقية والحوامل الورقية للأكواب، وده مش المشروع الأول للشركة الفنلندية في مصر، لأ ده الرابع، لأن سبق لنا التعاون معاها في مشروعات تانية، والشركة رصدت حوالي 1.5 مليار جنيه كتكلفة استثمارية، مخصص منها 24 مليون يورو هتضخ من خارج مصر. وهيتم يدعم المشروع البحث العلمي والابتكار.
ونقدر نقول إن المشورع ده مهم جدا لمصر، لأنه هيعمق استخدام المكون المحلي عشان توصل نسبته ل 70%، كمان المشروع بيستهدف إيجاد حلول مبتكرة ومستدامة في مجال التغليف والتعبئة، ده غير أنه مشروع صديق للبيئة، وبتنفذه شركة عالمية رائدة في مجال تصنيع منتجات التغليف والتعبئة.
ومش بس كده، لأ ده هيمثل دعم من الدولة لتعظيم دور القطاع الخاص والاستثمار الأجنبي المباشر، وكمان دعم لقطاع الصناعة عشان يحقق أهداف الدولة الاستراتيجية لتعزيز الصناعة والاستثمار والتنمية في وقت واحد.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
