قرض بدون فوايد 2025 لـ "ستات مصر" من البنك ده

قرض بدون فوائد 2025..بنوك كتير في مصر بتتنافس عشان تقدم خدمات جديدة ومميزة للعملاء، عشان تقدر تكسب أكبر قاعدة جماهيرية وبالتالي تعتمد عليهم في جني أرباح بشكل دائم وسريع، ولكن السر هنا بيكمن في الخدمة المتميزة أو المنفردة.

عشان كده، بنك ناصر الاجتماعي، بيقدم قرض بدون فوايد لفئة معينة من المواطنين، والقرض ده هو امتدادا لدور بنك ناصر الاجتماعي وطبقا لتوجيهات رئيس الجمهورية بإطلاق برنامج تمويلي متناهي الصغر للمرأة المصرية.

وفي الفترة الأخيرة، البنك أطلق تمويل "مستورة" للمرأة المصرية، عشان تكون عنصر فاعل ومنتج في المجتمع عن طريق تمكينها اقتصاديا واجتماعيا.

والقرض ده بدون فوايد،  وتم تخصيصه  للمرأة فقط، ولكن في شوية شروط مهمة عشان حضرتك تاخدي قرض مستورة.

أول الشروط، إنك تكوني مصرية الجنسية، وكمان سنك يكون بيبدأ 21 سنة ولا يزيد عن 60 سنة، وقيمة التمويل كحد أدنى بتكون 4 آلاف جنيه وبتوصل ل 50 ألف جنيهؤ ومافيش عائد أو فوايد، والمصاريف الإدارية للقرض بسيطة جدا.

نيجي لمدة السداد، فبتكون من سنة لحد سنتين، ولو عايزة القرض اتوجهي لأقرب فرع لبنك ناصر، وخدي شوية مستندات معاكي،  زي الرقم التأميني للعميلة والضامن، وصور بطاقة الرقم القومي سارية للعميلة والضامن، وكمان عقد إيجار أو تمليك لمحل المشروع لا تقل مدته عن مدة القرض، بالإضافة لإيصال مرافق حديث حال وجود محل للمشروع منفصل، وعقد إيجار أو تمليك لمحل السكن لا تقل مدته عن مده القرض بالإضافة لإيصال مرافق حديث، وبعد شوية إجراءات بسيطة هتقدري تاخدي القرض بكل سهولة.

وبعيدا عن قرض بنك ناصر، دلوقتي البنوك المصرية بتحذر عملائها، من عمليات النصب والاحتيال، فلو حضرتك عميل لأحد البنوك، اوعى تشارك بياناتك السرية مع أي شخص، سواء بيانات البطاقات البنكية أو الحسابات الشخصية، ورمز الأمان OTP وكلمات المرور.

كمان، حاول تحافظ على سرية البيانات  عشان بتحصل دلوقتي عمليات قرصنة وسرقة الحسابات البنكية بطرق كتيرة، زي المكالمات الهاتفية، حد مثلا يكلمك ويقولك أنا من البنك هات بياناتك زي أرقام الفيزا والرقم السري، أو من خلال الرسائل القصيرة وطلب رقم البطاقة البنكية لتحديث البيانات، فدول بينتحلوا صفة  موظفين خدمة العملاء، وبيسرقوك.

وهنقولك أفضل طرق تتعامل بها مع البنوك، وهي تطبيق الموبايل البنكي للبنك التابع لك، اللي ممكن تحمله من متجر التطبيقات فقط؛ آب ستور App Store أو جوجل بلاي Google Play، عشان تضمن  انك الوحيد اللي بيتعامل على حسابه البنكي، وإن مايحصلش عملية نصب وسرقة بياناتك وبعد كده سرقة فلوسك.

ولكن، لو اتعرضت للموقف ده، ماتنساش تبلغ عن محاولات سرقة الحسابات على الرقم الساخن للبنك اللي حضرتك تابع له.