قال الإعلامي عمرو أديب، إنه يدعم قرار وزارة التموين الخاص باستيراد بيض المائدة من تركيا، مشيرا إلى أن أسعار البيض المحلي أصبحت مرتفعة للغاية.
وأضاف أديب خلال برنامج "الحكاية" المذاع على قناة "أم بي سي مصر": "طول عمرنا مع الإنتاج المحلي وتشجيع الإنتاج وتقليل الاستيراد ولكن أنا شخصيا ليا مواقف واضحة لما الدنيا بتولع، لما الأسعار تزيد والتجار يرفعوا الأسعار بشكل واضح وكان ليا مواقف واضحة خصوصا فيما يتعلق بالدواجن والبيض وقلت أنا مع الاستيراد".
وأضاف: "أول ما الدولة تقرر تستورد تبتدي أسعار الدواجن والبيض ينزل، هل تتخيلوا أن مصر تستورد البيض من تركيا؟ مصر بلد إنتاجها من البيض معروف وواضح وبالمليارات وتوصل لمرحلة أن أنت بتبعت تجيب بيض من تركيا ويوصل سليم الكرتونة بـ 150 جنيه".
وتابع: "بيض تركي وأنت مصر هنا أنك تفضل بـ 170 و180 وفي بعض الأحيان بـ 200 طيب خلاص بيض أنت بقي، لما توصل الحاجة لمرحلة أن الناس بتتبهدل وتزودوا عليها الأسعار خلاص وعلى فكرة فجأة هيطلع حد يقولي أيه ياعم حرام عليك دي الصناعة دي فيها 2 مليون واحد يعني فاتحة 2 مليون بيت لو البيت فيه 5 أنفار يبقي 10 ملايين بني أدم أنت بتهدد حياتهم طيب الـ 100 مليون اللي بعد كده مين مسؤول عنكم".
وأوضح: "يا تعملوا أسعار كويس يا أنا مع قرار الدولة وقرار وزير التموين باستيراد البيض من تركيا لغاية لما انتوا تنزلوا في الأسعار نبقي نوقف استيراد البيض وصلتونا لمرحلة عشان كل الناس بتقول وتشجيع الصناعة الوطنية ويا جماعة لا لو كانت الصناعة الوطنية عاملة كده وهتبهدلوا الناس الحياة أهم".
وأكمل: "خلاص مش مستحملة بجد هنا 10 جنيه وهنا 30 جنيه وهنا دروس خصوصية طيب الناس هتعيش ازاي؟ لما تيجي الدولة تتدخل عشان الأسعار تتوازن أنا مع الدولة دلوقت كل ما يجي خلاص البيض هينزل يروحوا مطلعين حاجة يقولك أصل بصراحة البنزين زاد من شوية".
واختتم: "انتوا اتمسك فيكم ناس لان انتوا كنتوا عاملين احتكار للبيض الدولة المصرية قالتلي كده قالتلي يا عمرو في ناس بتعمل احتكار للبيض في ناس عايزة تفضل تبقي بتكسب على حساب دم الناس وفي الحالة دي الاستيراد حلال فراخ كده هات فراخ لحمة كده هات لحمة وخليهم يقعدوا في بيوتهم".
