أكد الإعلامي عمرو أديب أن الشعب المصري لا يجب أن يقلق من تصريحات الرئيس الأمريكي بشأن تهجير الفلسطينيين إلى سيناء، مشيرا إلى أن مصر دولة قوية وقادرة على الحفاظ على أمنها القومي.
وقال أديب خلال برنامج "الحكاية" المذاع على قناة "إم بي سي مصر": “هو أنت أضعف من بنما؟ العالم دلوقت قايم على إيه الراجل ده في دماغه هلاوس بنما قالوله معلش يا فندم وقالوله أعمل اللي أنت عايزه، كولومبيا قاله أعمل اللي أنت عايزه”.
وأضاف: "الرئيس الكولومبي قاله أقذر حاجة ممكن يقولهاله رئيس كولومبيا بيكذب ترامب لأن ترامب قال إن الرئيس الكولومبي اعتذر، وقاله أنا أعتذر في حالة واحدة بس لما أكون مشارك في دم الآلاف في غزة، مع احترامي لبنما وكولومبيا أنت أقل من دول يعني؟".
وتابع: "الدنمارك قالهم عندكم حته أرض بتاعتي وأنا أحط لكم فلوس على الطرابيزة، الدنمارك دي مبتتخانقش مع حد والنهاردة خناقة هو أنت اقل من الدنمارك وبنما وكولومبيا؟ أنت مهم وأنت مصر على سن ورمح".
وواصل: "أنا عارف قيمة أمريكا وقوة أمريكا بس أنا عارف يعني إيه مصر وفي النهاية لن يصح إلا الصحيح، الرئيس عبد الفتاح السيسي لم يذكر الأمن القومي المصري إلا قليلا في فترة حكمه".
وأكمل: "لا الرئيس ولا شعب الرئيس ولا جيش الريس ولا كل البلد موافق على الكلام ده، أنا عايز أقول للرئيس ترامب وهو ليه سفيره محترمة هنا وعاقلة وأظن الكلام ده ممكن يوصل اتجاه الرأي العام".
وأوضح: "هذا البلد لن يقوم بهذا الأمر، لن يحدث استقبال للفلسطينيين على أرض سيناء ولن نفرط في سنتي واحد، هو متخيل أن إحنا في مصر هنجري على الرئيس ونقوله أرجوك والأمريكان والفلوس، ترامب قال بتوحيد حتى المعارضين بالخارج لا أحد يستجري أن يقول اليوم أن الموقف المصري فيه أي حاجة".
وأكمل: "نحن على استعداد أننا إن شاء الله منتصرون في هذا الأمر وهيجي عليه وقت بسرعة هيقلب الصفحة ويشوف حاجة تانية، هو قال إحنا عملناهم كتير وإحنا كمان عملناهم كتير".
واختتم: "تسقط حكومة نتنياهو تاني يوم لو حسوا أن في تهديد للاتفاقية مع مصر، عايز بس أبصم بالعشرة على موضوع لما اتقال إنه اتصل والناس قالوا أه اتصل والرئيس وافق ولكن هو نفسه قال إن عبد الفتاح السيسي لم يوافق وأن الملك عبد الله لم يوافق".
