تحويلات المصريين في الخارج قفزت لـ26.3 مليار دولار في 11 شهر بس.. طب ليه الرقم ده مهم؟ وهل الزيادة دي كفاية عشان تحل أزمة نقص الدولار؟ ولا الأزمة لسه مستمرة؟
في 2024 تحويلات المصريين في الخارج زادت بنسبة 47.1%، ووصلت لـ26.3 مليار دولار خلال 11 شهر بس.. وده رقم كبير مقارنة بالسنة اللي فاتت.
لكن السؤال هنا: الفلوس دي بتفرق في الاقتصاد المصري ازاي؟
ببساطة تحويلات المصريين في الخارج هي أكبر مصدر للعملة الصعبة في مصر وبتتفوق على السياحة، قناة السويس، والاستثمارات الأجنبية المباشرة.. ولما التحويلات تزيد البنك المركزي بيلاقي دولارات أكتر وده بيساعد في تقليل الضغط على الاحتياطي النقدي.. والتحويلات دي كمان بتساعد في تغطية فاتورة الاستيراد خصوصًا إن مصر بتستورد جزء كبير من احتياجاتها بالدولار.
طب هل التحويلات دي هتحل أزمة الدولار؟
إحنا عندنا مشكلة نقص الدولار والبنك المركزي بيحاول يسيطر عليها عن طريق سياسات نقدية مختلفة طيب.. والجانب الإيجابي فى الموضوع ان لما المصريين في الخارج يحوّلوا فلوس أكتر العرض من الدولار بيزيد وده ممكن يساعد في تقليل الضغط على سعر الصرف، والحكومة والبنك المركزي ممكن يستخدموا الزيادة دي في دعم الاحتياطي النقدي.. وده يخلّي مصر تقدر تلبّي التزاماتها الدولية بسهولة أكبر.
لكن فيه تحديات.. رغم الزيادة الكبيرة في التحويلات، الطلب على الدولار في مصر لسه عالي جدًا بسبب الاستيراد والالتزامات المالية الخارجية.
طب ليه التحويلات زادت بالشكل ده؟
فيه كذا سبب وراء الزيادة الكبيرة في تحويلات المصريين بالخارج، منها تحسن أوضاع المصريين العاملين في الخارج بعد التعافي الاقتصادي في الخليج وأوروبا.. وكمان إجراءات البنك المركزي المصري اللي شجعت المصريين يحوّلوا فلوسهم عبر القنوات الرسمية بدل السوق السودا..و استقرار سوق الصرف نسبيًا وده خلّى الناس تثق أكتر في التحويلات الرسمية.
وايه تأثير التحويلات على المواطن العادي
تحويلات المصريين مش بس رقم على ورق دي بتأثر بشكل مباشر على حياة الناسمن خلال استقرار الجنيه.. لو التحويلات فضلت تزيد ده ممكن يساعد في تقليل تقلبات سعر الدولار وده ينعكس على الأسعار في السوق..كمان زيادة الدولار في السوق ممكن تشجّع المستثمرين على ضخ فلوسهم في مشاريع جديدة..والمصريين اللي بيحوّلوا الفلوس بيستخدموها في شراء عقارات.. استثمارات.. أو حتى مساعدة أهاليهم وده بينشط الاقتصاد.
خلاصة الكلام تحويلات المصريين بالخارج زادت ودي حاجة إيجابية جدًا لكنها لوحدها مش كفاية عشان تحل أزمة الدولار بالكامل.. الحل النهائي لازم يكون من خلال زيادة الصادرات وجذب استثمارات أجنبية، وتقليل الاعتماد على الاستيراد بالدولار
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
