متابعينا الكرام في كل مكان أهلا وسهلا بكم ورصد جديد لأهم التقارير اللي قدمته وحدة أبحاث بانكير على مدار الساعة.
منصات بانكير قدمت عدد من التقارير الهامة والبداية مع تقرير دولي هام عن الاقتصاد المصري وسعر صرف الدولار في الفترة الجاية..
وشرح التقرير أن بنك الاستثمار الأمريكي جولدمان ساكس توقع في أخر تقرير ليه من ساعات ارتفاع سعر الجنيه المصري مقابل الدولار والعملات الأجنبية الرئيسية التانية في الفترة الجاية وفسر البنك الدولي توقعاته بارتفاع وتيرة تدفقات الأموال الساخنة في اداوت الديون المصرية واللي هي السندات وأذون الخزانة.
ولفت التقرير إن فريق من البنك الأمريكي زار مصر في الفترة اللي فاتت واطلع عن قرب على مؤشرات الاقتصاد المصري وقال إن كل الظروف مهيئة لتدفق المزيد من الأموال الساخنة لمصر ودا هيكون سبب مهم في ارتفاع سعر الجنيه المصري ومع التحسن الكبير في التدفقات الدولارية للدولة المصرية.
وأشار التقرير إن جولدمان ساكس أشاد بالمجموعة الاقتصادية الحالية في مصر وقال إن عندها فكر مختلف وتنسق الجهود في عملية صنع السياسات، ودا بيخلق ببيئة مُحسنة في القطاعات الاقتصادية.
وقال تقرير بانكير إن تقرير جولدمان ساكس شهادة دولية جديدة على تحسن الجنيه المصري ودا بيأكد أن الناس اللي المسؤولة عن الملفات الاقتصادية ناس محترفة وفي نفس الوقت التقرير الدولي بيرد على منصات التسخين وأهل الشر اللي بيروجوا لارتفاع الدولار وإنه هيوصل لأرقام كبيرة ودا طبعا مش حقيقي بلغة الأرقام وبشهادة المؤسسات المالية الدولية.
التقرير التالي اللي نشرته منصات بانكير كان بخصوص أخطر تحدي في 2025 والخاص بالديون المطلوب سدادها في 2025
وقال التقرير إن السنة دي مصر عندها التزامات كبيرة بخصوص الديون الخارجية المطلوب سدادها.. وشرح التقرير إنه في أول 9 شهور بس من 2025، مصر عندها التزامات خارجية بقيمة 43.2 مليار دولار. الرقم ده مش مجرد قروض وفوايد هو كمان موزع على جهات مختلفة.
وشرح بانكير إن الحكومة هتدفع حوالي 10.4 مليار دولار.. والبنك المركزي مطلوب منه 21.2 مليار دولار…والبنوك التجارية عليها 8.1 مليار دولار.. والقطاعات التانية حوالي 3.5 مليار دولار.
وقال التقرير إنه في أول 3 شهور بس من السنة الحالية مطلوب من مصر تسدد 23.2 مليار دولار.. وفي الربع التاني، الرقم بينزل شوية لـ 11.1 مليار دولار.. .. وفي الربع التالت، المبلغ بيقل أكتر لـ 9 مليار دولار.
وشرح بانكير طريقة تدبير الأموال للديون الخارجية وقال إن وزير المالية أحمد كوجك قال بوضوح إن الحكومة عندها استراتيجية متكاملة لخفض الدين والتضخم.. وإن الدولة بتركز على جذب استثمارات مباشرة، وزيادة الاحتياطي النقدي وتخفيف الضغط على العملة المحلية.
وحدة أبحاث بانكير قدمت تقرير خاص النهاردة عن تغير قواعد اللعبة بعد وصول ترامب لحكم أمريكا.
وشرح التقرير إن إعلان الرئيس الأمريكي لحالة الطوارئ في مجال الطاقة معناه قرارات استثنائية بخصوص النفط والغاز والمعادن اللي أمريكا بتحتاجها والكلام ده ممكن يشمل زيادة إنتاج الطاقة بأي ثمن وتجاوز قوانين البيئة اللي بتحد من التلوث وفتح الباب لحفر آبار جديدة وبناء مصافي وحتى تشغيل محطات طاقة بأقصى طاقتها بغض النظر عن القوانين اللي كانت بتحكمها قبل كده.
وشرح التقرير إن ترامب دايمًا بيتكلم عن "استعادة العظمة الأمريكية" وبالنسبة له مفتاح العظمة ده في الطاقة في خطابه الأخير قال: "أمريكا هتكون غنية تاني... والدهب السائل تحت رجلينا هو اللي هيعمل كده.
ولفت التقرير إن رؤية ترامب واضحة وهي إن أمريكا تبقى المصدر الأول للطاقة عالميًا وتقليل الاعتماد على أي واردات خصوصًا من الصين وروسيا وكمان ضغط سياسي واقتصادي على أوروبا وآسيا من خلال التحكم في سوق الطاقة.
وسلط التقرير الضوء على تبعات قرارت ترامب على سوق الطاقة وأكد إن القرارات دي هتخلق اضطرابات كبيرة أهمها ان زيادة إنتاج أمريكا للطاقة هتضغط على أسعار النفط والغاز عالميًا والدول اللي بتعتمد على تصدير الطاقة زي الخليج وروسيا هتتضرر بشدة.. ولو أمريكا بدأت تتجاوز القوانين البيئية ده ممكن يخلي دول تانية تاخد نفس الخطوة خصوصًا في حالات نقص الطاقة.
التقرير الأخير اللي قدمته منصات بانكير بخصوص مصير أسعار الدهب العالمي في عهد ترامب.
وشرح التقرير إن سوق الدهب بيعيش أوقات صعبة مع تنصيب ترامب ودا بسبب دفاعه المستيميت على الدولار وفي نفس الوقت هدوء الصراع في الشرق الأوسط وتحسن المؤشرات الأمريكية على عكس المتوقع.
وقال التقرير إن كل العوامل دي بتصب في اتجاه تخفيض أسعار الدهب عالميا وإنه بمجرد فوز ترامب تراجعت رهانات صناديق التحوط على صعود الدهب إلى أدنى مستوى ليها ودا قلل الطلب على المعدن الاصفر وفيه توقعات بتقول إنه مش هيوصل لمستوى 3 آلاف دولار زي ما توقعت اغلب المؤسسات المالية الدولية قبل وصول ترامب واكيد دا هيكون ليه تأثير مباشر على سعر الدهب في الصاغة المصرية لانها مرتبطة بالسعر العالمي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
