إيه اللي بيحصل في القطاعات الاقتصادية وإيه المؤشرات الجديدة اللي بتقول إن مصر في 2025 هتكون في حتة تانية.. تعالو نشوف الأرقام بتقول إيه .. تابعونا للنهاية.
الأرقام هي الفيصل لما نيجي نتكلم على الاقتصاد لأنها مش بتجامل ولا بتخبي والأرقام اللي بنشوفها دلوقتي في الاقتصاد المصري بكل قطاعاته بتقول إن سنة 2025 هتكون سنة الانفراجة الكبرى.
وعلى سبيل الأرقام.. تحويلات العاملين في الخارج قفزت في أول 10 شهور من 2024 بنسبة 45% لتصل إلى 23.7 مليار دولار مقارنة بـ 16.3 مليار دولار في الفترة نفسها من السنة اللي فاتت وبالرقم دا مصر ضمن أول 7 دول في العالم في تحويلات العاملين بالخارج والجديد بقي إن أرقام تحويلات المصريين بالخارج مرشحة للزيادة في 2025 ودا بسبب التيسيرات البنكية والمالية في التحويلات اللحظية اللي أعلن عنها البنك المركزي.
نروح لرقم تاني وهنشوف إن السياحة حققت ارقام قياسية هي كمان وتخطت الـ14 مليار دولار في موسم استثنائي في أرقامه وفي الظروف اللي حوليه والأهم بقي إن التوقعات بتقول إن 2025 هيكون موسم فوق القياسي وهتتحقق فيه ارقام قياسية جديدة محصلتش في تاريخ السياحة.
ولو هنتكلم على ملف الاستثمار فكفاية أقول لحضرتك إن الشهور اللي فاتت شهدت قفزات وصفقات بالمليارات وحسب البيانات الرسمية مصر استقبلت صافي تدفقات استثمارية مباشرة من الدول العربية بقيمة 21 مليار دولار خلال الربع الأخير من العام المالي اللي فات ووصل إجمالي استثمارات الدول العربية لمصر خلال العام المالي نفسه 39.448 مليار دولار مقابل 4.3 مليار دولار بنهاية العام المالي السابق له يعني بنتكلم في زيادة غير مسبوقة في تاريخ الاستثمار في مصر وإن المؤشرات بتقول إن دي مجرد بداية في ملف الاستثمار المباشر واللي الرئيس السيسي بيتابعه بنفسه وإن في 2025 الوضع هيختلف وهنشوف أرقام ضخمة تانية في صفقات جديدة الحكومة بتحضرها في البحر الأحمر والبحر المتوسط ودا غير صفقات الاستثمار اللي بنسمع عنها كل يوم في القطاع الصناعي والمناطق الصناعية وتوطين البراندات العالمية لمصانعها في مصر وفي صناعات جديدة وتكنولوجية لأول مرة في تاريخ الدولة المصرية.
لو بصينا على بند التصدير هنلاقي إن الارقام بتقول إننا بصدد قفزة كبيرة بعد تجاوز الصادرات لـ41 مليار دولار والمؤشرات بتقول إن الحكومة هتوصل لرقم 145 مليار دولار قبل 2030 وخلي بالك احنا بنتكلم في صادرات غير بترولية.
طبعا الأرقام كتيرة جدا لكن كلها واخدة اتجاه صعودي قوي ودا في عز الأزمات اللي بتمر بيها المنطقة ودا بيقول إن مصر ماشية على الطريق الصحيح وإن سنة 2025 هتكون سنة الإفاقة للاقتصاد المصري والأرقام ما بتكدبش.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
