من فترة طويلة والمستثمرين وأصحاب القري والمنشآت السياحية بيقولوا عندنا مشكلة في عدد الغرف الفندقية وان مصر عندها مشكلة في قطاع الفنادق لو عايزة توصل ل 30 مليون سائح... ياتري اية هي المشكلة دي.. وازاي الحكومة هتحلها .. خليكم معانا للآخر وهتعرفوا التفاصيل.
مصر حاليا بدأت مرحلة جديدة من الإصلاحات الاقتصادية وطبعا المرحلة دي بتستهدف دخول إيرادات جديدة من النقد الأجنبي من كل القطاعات، وقطاع السياحة واحد من أهم مصادر الدخل الأجنبي لكل العالم مش مصر بس، وعلشان كده مصر بتحاول بكل الطرق أنها تحل اي مشكلة موجودة في القطاع ده وتنهي المشاكل اللي بيعاني منها القطاع علي مدار سنين طويلة واللي كان فيها القطاع بيدار بالبركة .
في الفترة الحالية مصر بتستهدف الوصول إلي 30 مليون سائح بحلول 2028 وتحقيق 30 مليار دولار كايرادات من القطاع، وفعلا الحكومة بدأت ترسم الخطة للوصول للرقم ده، وبدأت تستهدف دول معينة لجذب أكبر نسبة ممكنة من السياحة العالمية وطبعا البنية التحتية في كل القطاعات خصوصاً مشروعات تطوير وسائل النقل والمواصلات وتحديث الخدمات السياحية بالمطارات والمناطق الأثرية، والمشروعات السياحية اللي قامت بيها الدول في كل المجالات عززت هدف مصر للوصول للرقم المستهدف وهو الوصول إلي 30 مليون سائح في 2028.
وزي ما احنا عارفين أن مصر عندها ازمة كبيرة حاليا بسبب وقوعها في المنطقة العربية واللي للاسف أصبحت محاطة بكم كبير من الصراعات والحروب اللي طبعا اثرت علي الدخل الدولاري المصري من قطاعات كبيرة جدا منها قطاع السياحة واللي للاسف في الفترة اللي فاتت وعلي الرغم من الارقام الكبيرة جدا اللي حققها القطاع في 2023 واللي وصلت لكسر الرقم القياسي بالوصول الي 14.9 مليون سائح، والرقم تعدي الرقم اللي حققته مصر في 2010 لما حققت مصر 14.6 مليون سائح وده كان اعلي رقم حققه قطاع السياحة علي مدار تاريخه .
طيب اية اللي بتعمله مصر علشان نوصل الي 30 مليون سائح؟.
وزيرا السياحة والآثار والمالية، أعلنوا عن إطلاق مبادرة دعم القطاع السياحي واللي بتتضمن إتاحة 50 مليار جنيه تسهيلات تمويلية للشركات السياحية، وتيسيرات في سداد الأقساط بهدف زيادة الطاقة الاستيعابية للغرف الفندقية، واعطت الأولوية لمحافظات الأقصر وأسوان والقاهرة الكبرى والبحر الأحمر وجنوب سيناء.
شريف فتحي وزير السياحة والآثار، قال إن المبادرة بتعتبر خطوة مهمة لمساندة وتحفيز الاستثمارات السياحية الفندقية لاستيعاب الزيادة في أعداد الحركة السياحية المستهدفة، وأكد أنه هيتم السماح للمستثمرين الاستفادة من التسهيلات بالتقدم على مدار عام، والحد الأقصى لتمويل العميل الواحد مش هيتجاوز مليار جنيه، وهيوصل ل 2 مليار جنيه في حالة الأطراف المرتبطة.
شريف فتحي قال كمان أن الشركات المستفيدة من المبادرة هتتحمل سعر عائد منخفض ومتناقص هيوصل ل 12%، ومش هتتجاوز مدة السحب عن 16 شهر في موعد أقصاه نهاية يونيه 2026، وهيتم منح الشركات مهلة 6 أشهر بعد الانتهاء مدة السحب للحصول على رخصة التشغيل النهائية أو المؤقتة، وان عدد الطلبات اللي تقدمت للاستفادة من المبادرة وصل حتى ل 96 طلب انطبقت عليهم شروط المبادرة
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
