إيه اللي حصل في مصر الساعات اللي فاتت وإيه المقصود بتصريحات الرئيس السيسي الأخيرة والاقتصاد المصري رايح على فين.
الايام والساعات اللي فاتت مصر شهدت أحداث اقتصادية وبيانات مالية مهمة جدا .. وأهم حاجة حصلت كانت تصريحات الرئيس السيسي عن قوة مصر بكل ما تحمله الكلمة من معني سواء قوى سياسية أو اقتصادية أو عسكرية أو ثقافية.
والرئيس السيسي زي عادته السنوية زار الاحتفال بعيد الميلاد المجيد مع الأقباط في كاتدرائية العاصمة الإدارية الجديدة وقال كلمة مهمة جدا ضمن كلامه على مصر والأوضاع والظروف الصعبة اللي مرت بيها في السنة اللي فاتت وكلنا عارفين إن الظروف دي كانت نتاج أزمات حولينا احنا مش طرف فيها لكن أثرت في مصر بشكل مباشر بسبب الخسائر الاقتصادية الكبيرة اللي اتعرضت ليها مصر.
الرئيس السيسي قال إن السنة الحالية 2025 هتكون أحسن وأفضل من اللي السنة اللي قبلها وإن مصر قدرت تعبر المرحلة الخطرة من الأزمة لكن الرئيس قال جملة مهمة جدا وبالاصح رسالة لمن يعنيهم الرسالة لما قال إن مصر بلد كبيرة وقوية أوووي وكررها 3 مرات والتكرار هنا معناه التأكيد على الرسالة وتحذير للأطراف المتربصة بمصر.
الرئيس السيسي كان يقصد كمان بقوة مصر الكبيرة الاقتصاد الوطني واللي دخل مرحلة الاقتصاديات الكبري من حيث البنية الأساسية الحديثة والتصنيع والتجارة واللوجستيات والسياحة والزراعة والنقل والتطور اللي بيحصل في كل القطاعات.
الأوساط الاقتصادية المصرية استقلبت تقارير دولية مهمة جدا في الفترة اللي فاتت أهمها تقرير منصة بيزنس أفريكا وهي منصة معتمدة دوليا وعندها سمعة وثقة في كل مؤشراتها الاقتصادية وعندها فريق ابحاث ممتاز اختارت مصر في صدارة قائمة أفضل خمس دول إفريقية من حيث مؤشر جودة الحياة لسنة 2025.
مصر احتلت كمان مركز متميز في بيانات مؤشر "نيمبو" لتكلفة المعيشة في العالم ودا بيأكد على سعيها المستمر لتحسين مستوى معيشة مواطنيها وتعزيز جودة الحياة وضمت القايمة جنوب إفريقيا وتونس والمغرب وكينيا بجانب مصر وحسب التقرير الدول دي شهدت تقدم ملحوظ في مستويات المعيشة والخدمات الأساسية.
وعلى الصعيد المالي مصر حققت قفزة تاريخية في احتياطي النقد الأجنبي لمصر بعد إعلان البنك المصري ارتفاع الاحتياطي النقدي الى 47.100 مليار دولار وطبعا في أسباب ساهمت في رفع احتياطي النقد الأجنبي لمصر، وأولها زيادة تدفقات الاستثمارات الأجنبية المباشرة على مصر، بالإضافة لوجود مجالات كتير يقدر المستثمرين يضخوا فيها فلوسهم سواء في الصناعات المختلفة أو في مصادر الطاقة أو غيرها.
كل ده بجانب التسهيلات اللي بتقدمها الحكومة دلوقتي لأي مستثمر شغال في مصر، واللي من ضمنها الرخصة الذهبية اللي بتسهل عليه أي حاجة صعبة.
كمان، تحسن مؤشرات قطاع السياحة وزيادة عائدات الصادرات المصرية ساهم في رفع احتياطنا من النقد الأجنبي، ودي رسالة مهمة جدا للمنظمات والمؤسسات المالية العالمية، بتؤكد إن مؤشرات اقتصاد مصر خضراء وفي منحنى تصاعدي بشكل مستمر.
طبعا كل ده هيساهم في تعزيز قيمة الجنيه المصري قدام العملات الأجنبية، عشان يتم تخفيف معدلات التضخم اللي حصلت في السنين الأخيرة، وبالتالي تخفيف العبىء على المواطنين البسطاء.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
