بمناسبة عيد الميلاد المجيد 2025.. قدم الرئيس عبدالفتاح السيسي التهنئة للبابا تواضروس وجموع المسيحيين بمناسبة عيد الميلاد المجيد، بكاتدرائية ميلاد المسيح بالعاصمة الإدارية الجديدة، قائلًا "كل عام وأنتم طيبون وقداسة البابا بخير وسلام وإحنا كلنا بخير وسلام".
رسائل الرئيس السيسي في عيد الميلاد المجيد 2025
وقال الرئيس السيسي - أثناء مشاركته لأقباط مصر في احتفالات عيد الميلاد المجيد 2025 بكاتدرائية ميلاد المسيح بالعاصمة الإدارية الجديدة - إن "شاء الله عام سعيد أفضل من السنوات اللي فاتت.. أنا بتابع كل الأمور وبشوف كل ردود الأفعال والقلق يمكن يكون مبرر، وأنتم لازم تعرفوا إن السنين اللي فاتت كان فيها قلق واللي قبلها كان فيها والظروف الصعبة موجودة بقالها سنوات طويلة جدًا".
وأضاف الرئيس السيسي: إن شاء الله تعدي الأمور بسلام، بس خلوا بالكم من الكلام اللي دايمًا بقوله لينا جميعًا، إحنا هنا في مصر في حاجات كتير أوي بنعملها محدش من الناس واخد باله منها أول حاجة فيها إن إحنا مش ناسيين إن في رب ماسك الدنيا ومش متسابة كدا.
ومن ضمن رسائل الرئيس في عيد الميلاد المجيد 2025 قوله: يمكن حد ينسى مع الظروف يتهيأله إن الأمور مش ممسوكة كده، مش بينا إحنا، البشر، لا الدنيا مش متسابة كده، إحنا مؤمنين بالله كلنا صحيح لكن مش عاوزين ننسى، لازم كلنا نبقى متأكدين من النقط دي، لازم كلنا نعرف إن ربنا موجود ومحدش يقدر يعمل أي حاجة في الوجود اللي إحنا فيه ده إلا بأمر الله سبحانه وتعالى.
الرئيس السيسي في قداس عيد الميلاد
وأشار السيسي إلى أن حجم الوعي والفهم الموجود عند المصريين ضخم جدا بيخليهم فاهمين وشايفين ومستعدين يتعاملوا مع أي أمر ممكن يشوفوه جوا أو برا مصر.
واختتم الرئيس السيسي قائلًا - خلال قداس عيد الميلاد المجيد 2025 - الحاجة الأخيرة إن إحنا كدولة وأنا كأنسان مسؤول عنكم فلازم تتطمنوا إني كنت بتعامل مع كل الأمور بشرف كبير وأمانة ونزاهة كبيرة، والنقطة دي أنا بقولها لكم لأنها مهمة أوي لأن لو كان المسؤول عنكم إنسان مش كويس خافوا على بلدكم، ولو ايده متعاصة بدم الناس خافوا على بلدكم، لو إيده واخدة أموال الناس خافوا على بلدكم، والحمد لله لا دي موجودة ولا دي موجودة.
