أكد الإعلامي عمرو أديب أن على الدولة فتح المجال للحديث عن المشكلات التي تواجه البلاد، مشيرا إلى أن اجتماع رئيس الوزراء مع عدد من رجال الأعمال كان مهما للغاية.
وقال أديب خلال برنامج "الحكاية" المذاع على قناة "إم بي سي مصر": "هو حصل ايه لما الناس اتكلمت؟ هل حد كان عنده فرصة من الناس دي أنه يتكلم بالوضوح والمباشرة دي؟ أنا مكنتش حاسس أنها موقعة حربية دول ولاد البلد والناس اللي شغالة في السوق وعندها مصالح ودا حقها".
وأضاف: "كل واحد بيتكلم من المصلحة اللي هو شايفها، أحمد عز لما اتكلم كان عن الحديد وهشام طلعت مصطفى عن التمويل والإتربي لما أتكلم قال عندنا 2300 شركة راحوا الإمارات الفترة اللي فاتت".
وتابع: "لأول مرة نسمع الناس تتكلم والحكومة تسمعها ايه الشيء اللي انتقص من الدولة المصري؟ خلوا الناس تتكلم والحوار يحصل خلينا نغير من حيث الموضوع أهم نقطة أرجو أن أنا تكون وصلتني صح أننا أخيرا أن هناك اقتناع من الدولة بضرورة القطاع الخاص خلاص".
وواصل: "وصلنا لليقين أن الـ 30/70 الموجودة دي غلط ولازم تكون لمصلحة القطاع الخاص، دع القطاع الخاص يعمل وأنت دورك كله مسهل، أشوف أنت محتاج أرض ايه أو كهربا فين وليس عملي أن أكون منافسا لك في السوق".
وأكمل: "أرى أن الدولة لأول مرة تقر أن الناس دي واللي زيهم هما اللي لازم يقودوا الاقتصاد في مصر، ايه اللي جرا في مصر هل حصل زلزال؟ ولا أي حاجة خالص، أرجو أن تكون الدولة هذه المرة صادقة جدا في هذا الأمر، هتقولي يعني ايه؟ هقولك ببساطة وبصراحة لما يجي رئيس الوزراء قال مفيش مطار هيقعد تحت إدارة الدولة وقال كل المطارات لأنه عندما يقول رئيس الوزراء هذا الكلام هو يقر أن الدولة ليست مديرا جيدا".
واختتم: "رئيس الوزراء قالك هنجيب إدارات لكل المطارات، بين قوسين أرجوك أن الدولة لا تدخل متنكرة في أي شيء في مطار هيثرو أو أكبر المطارات في العالم لما راحوا جابوا ناس من برة، هات أكبر شركة في العالم هي اللي بتقود".
