علق الإعلامي شريف عامر على إعلان وزارة الداخلية ضبط سائق ادعى أنه وجد 8 ملايين جنيه وقام بردها إلى صاحبها دون أن يحصل على مكافأة.
وقال عامر خلال برنامج "يحدث في مصر" المذاع على قناة "أم بي سي مصر": "امبارح أنا سألته سؤالين لأنه كان هناك بعض الشك في قلبي، الراجل بتاع زكيبة الفلوس أنا سألته سؤالين أنت ليه مرحتش القسم وأنت تضمن نفسك ازاي؟ هل كان في شهود مضوا أنهم استلموا الفلوس؟ مين اللي استلم الفلوس عشان تضمن افرض جالك واحد وقالك الفلوس دي بتاعتي أنا".
وأضاف: "أنا سألته سؤالين لأنه كان هناك بعض الشك عندي في الحقيقة في المسألة دي ولكن كنا بنتكلم مع صاحب الحالة ومش متخيلين إيه ممكن يكسبه، علامات الاستفهام اللي بعرضها على حضراتكم دي تم الإجابة عليها من سلطة التحقيق أو من سلطة التحريات وهي وزارة الداخلية".
وتابع: "وزارة الداخلية النهاردة طلعت بيان وقالت إن الراجل بتاع امبارح اخترع الحكاية من خياله وأن مفيش أساسا 8 ملايين جنيه وعمل الحكاية دي مع طرف تاني، والطرف التاني ده مش عارف هو اللي كان بيصور والا اللي عمل أنه بيستلم الفلوس".
وواصل: "ايه الهدف؟ بيان الداخلية قال إنه يستفيد بجمع تبرعات أو مساعدات والرزق يكتر، وبسبب الخبر ده احنا عاملين بكرة فقرة كاملة ايه اللي بنشوفه حقيقي على وسائل التواصل وايه اللي مش حقيقي، وامتى حياتك تتحول من تريند لطيف إلى جنحة أو جناية".
وكان الإعلامي شريف عامر قد أجرى مكالمة تليفونية مع السائق خلال حلقة البرنامج يوم أمس واستفسر منه عن تفاصيل الواقعة قبل أن تعلن الشرطة أن الواقعة مختلقة بالكامل.
