عمرو أديب يعلق على ظهور مسيرات غامضة في سماء الولايات المتحدة

علق الإعلامي عمرو أديب على ظهور مجموعات من الطائرات المسيرة في سماء ولايتي نيويورك ونيوجيرسي الامريكيتين.

وقال أديب خلال برنامج "الحكاية" المذاع على قناة "أم بي سي مصر": "بقالنا كام يوم في الولايات المتحدة الامريكية مش في بلد صغيرة ولا بتصرف تريليون دولار ميزانية وزارة الدفاع، واسمعوا اللي بقوله بجد بقالنا أسبوع أو عشر أيام ولاية نيويورك وولاية نيوجيرسي فيها درونات كمية المسيرات في سماء نيوجيرسي بحجم سيارة نقل كبيرة".

وأضاف: "لغاية دلوقتي هتقولي في ايه ياعمر إيه المشكلة يعني ناس طلعوا درونات فوق حد بيعمل دعاية أو أي حاجة، نمرة واحد لما يبقي عندك حاجة زي دي مستمرة لأيام اعداد كبيرة من المسيرات في سماء الولاية يسألوا اف بي أي ايه ده؟ يقولهم معرفش مهو الشعب الأمريكي والميديا الامريكية قاعدين للموضوع ايه اللي في السما دا يا جماعة".

وتابع: "يرد الراجل بتاع اف بي أي يقولك معرفش، يسألوا الناس بتوع البنتاجون اللي مفروض عارف نوع طائر الوروار اللي طاير فوق سوريا، يسألوا البنتاجون يقولوا مش عارفين فعلا دا ايه والناس العادية بدأت تسأل أعضاء الكونجرس ياجماعة ايه ده؟ دي حاجات بأحجام ضخمة جدا ايه دا؟ يقولهم على فكرة نظن أن ممكن الإيرانيين عملوا الكلام ده؛ إيرانيين ايه هيبعتوا المسيرات دي ازاي؟".

وواصل: "واحد تاني يقوله كانت الصين عندها بالون معدي من فوق أمريكا لاسباب مناخية؛ أنا بقول لحضراتكم حتى اللحظة هذا الامر لغز لا احد يعرف ماذا في السماء، الدرونات اللي انتوا شايفينها دي الناس بتقول مش شبه الدرونات العادية".