الدهب من المعادن النفيسة جدا وعشان كده بتدخل ضمن احتياطيات الدول النقدية زيها زي الدولار واللي بيملك الدهب بيملك قوته الاقتصادية والسياسية كمان.. مصر هتعمل ايه عشان تتحول الى مركز عالمي لإنتاج وتصنيع الدهب في الفترة الجاية.. خليكم معانا للآخر وهتعرفوا التفاصيل في التقرير ده
مصر أول دولة في العالم عرفت أهمية الدهب وقدرت تستخرجه كمان من 7 آلاف سنة وقدرت يكون عندها صناعة وتعدين وتنقية الدهب وعرفت توصل للمناجم في الجبال واللي لسه موجوده لغاية دلوقتى ويظهر كده إن مصر ناوية ترجع تاني ملكة الدهب في العالم.. طيب ايه اللي بيحصل دلوقتي في الموضوع ده ؟
شوف حضرتك لو متابع نشاط وزارة البترول والثروة المعدنية من شهور طويلة هتعرف أنها طرحت مزايدات كتير للتنقيب عن الدهب والثروات في طول مصر وعرضها ومصر عندها دلوقتي حوالي 270 موقع لإنتاج الذهب، بينها حوالي 120 موقعًا ومنجمًا معروفين تم استخراج الدهب منهم قديما وتتوزع إلى 4 قطاعات، ومن بينهم طبعا منجم السكري وهو أكبر منجم للدهب مكشوف في العالم كله وبيتم استخراج الدهب بطريقتين في مصر الطريقة التقليدية وهي حفر المناجم وتفتيت الصخور اللماعة، والطريقة التانية وهي الحديثة ويتم خلالها عمل دراسات جيولوجية لمناطق تواجد الدهب في طبقات الأرض.
ومصر وقعت اتفاقيات للتنقيب عن الدهب مع شركات عالمية كتير وخاصة الشركات الكندية والبريطانية وفي نوفمبر اللي فات الحكومة المصرية أعلنت طرح مزايدة عالمية للبحث والتنقيب عن الدهب في الصحراء الشرقية في اكتر من 200 منطقة تقع فى الصحراء الشرقية، ويتوافر في الكثير منها الشواهد الاقتصادية الجذابة لشركات التعدين والمستثمرين عن الدهب والتوقعات بتقول إنه بعد الانتهاء من أعمال التنقيب مصر هتكون مركز إقليمي وعالمي في إنتاج الدهب مع المناجم الموجودة حاليا
طيب أي الجديد في قصة انتاج الدهب؟
في الساعات الأخيرة المهندس كريم بدوي، وزير البترول والثروة المعدنية، اجتمع مع مسؤولي شركة باريك جولد الكندية، وتمت مناقشة أبرز ملفات التعاون المشترك بين الجانبين، وفي مقدمتها نموذج اتفاقية الاستغلال اللي تم التوصل إلى توافق بشأنه مؤخرًا بين وزارة البترول ووزارة المالية وشركة باريك..
وخلال الاجتماع أكد مسئولي شركة باريك رغبتهم في الحصول على مناطق امتياز جديدة في مصر لزيادة الإنتاج في القطاع الواعد والوزير لقاها فرصة لدعوة شركة باريك جولد إلى المشاركة في المزايدة الجديدة للبحث عن الدهب والمعادن المصاحبة المزمع طرحها خلال الربع الأول من 2025.
وشهد اللقاء التوقيع على الاتفاقية الإطارية والتي تسمح لشركة باريك العالمية بالاستثمار داخل جمهورية مصر العربية بالحصول على مناطق امتياز لاستغلال خام الدهب.
طبعا زيادة إنتاج مصر من الدهب يهديها عنصر قوة اقتصادية جديدة وجبارة لأن زي ماقلنا الدهب بيعتبر نقد مالي في خزائن الدول وزيادة تحكم مصر في إنتاجه هيدي البلد ميزة كبيرة على مستوى الاقتصاد وفي سوق الصرف كمان والحكومة بتخطط دلوقتي لزيادة مساهمة قطاع التعدين في الناتج القومي إلى 5% بالتزامن مع زيادة صادراتها التعدينية إلى 10 مليارات دولار في 2040 من 1.6 مليار دولار حالياً.
وسجل إنتاج الدهب في مصر 559 ألف أوقية خلال العام المالي الماضي، وبيجي اغلبه من منجم السكري في الصحراء الشرقية، بالإضافة إلى مناجم حمش وإيقات، إلى جانب شركة شلاتين للثروة المعدنية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
