شهدت ندوة «تأثير العمل الدرامي على المجتمع»، المقامة حاليا بمهرجان الجونة السينمائي في دورته السابعة، جدلًا بين يوسف الشريف ونيللي كريم، وكريم الشناوي حول تقديم العمل الدرامي.
يوسف الشريف يتحدث عن تأثير العمل الدرامي على المجتمع
قال يوسف الشريف خلال الندوة، «إنك تدور على اللي الناس بتحبه وتعمله، دا غلط جدا، لازم يكون عندك فكرة تقدمها في الأعمال الفنية، وكنت مع كل عمل درامي ليا بدخل عامل ريسك، محدش بيعمل النوعية اللي بعملها دي، احترام الجمهور يجي من إنك تعمل شغلك بمجهود كبير، شغلتنا كلها بتيجي إننا نحكي حدوتة بس بشكلك وطريقتك، أنا مينفعش أشيل الجمهور مسئولية حاجة، لأنه دائما على حق، وكل ما كانت الجودة عالية كل ما كانت المشاهدة أعلى».
يوسف الشريف: يوسف شاهين السبب إني معملش مسرح
وأضاف: «يوسف شاهين السبب إني معملش مسرح، ولكن دلوقتي نفسي أعمل مسرح، والدراما مهمتك بتبقي أصعب من السينما، والدراما دلوقتي غير زمان، لأن السينما بتقعدوا في أوضة وسماعات وصورة وجودة عالية، فهو قاعد مهيأ يشوف كل التفاصيل، إنما المسلسل هو المشاهد بيقعد وبيبقى ساعات قاعد وراه مليون حاجة، بس سايب حاجات كتير وقاعد بيتفرج عليك أنت».
كريم الشناوي: المسلسلات هتعيش أكتر من الأفلام
بدوره قال كريم الشناوي: «أنا مختلف في جملة إن الأفلام بتعيش عن المسلسلات، لأنها كانت موجودة بسبب عدم قلة عرض المسلسلات، وأنا شايف دلوقتي الوضع اختلف، الأفلام بتحكي قصص في فترة زمنية معينة، والمسلسلات بتحكي القصة في فترات زمنية مختلفة، وأنا عمري ما نسيت السينما نهائي، المسلسلات هتعيش، وفي العالم مؤخرا هتلاقي الناس كلها بتحب تتفرج على المسلسلات أكتر من الأفلام، وفي حاجات مينفعش تتعمل أفلام، واحنا في اللحظة الحالية لازم نقتنع إن المسلسلات هتعيش أكتر من الأفلام، والناس بتتفاعل مع الشخصية في العمل الدرامي أكتر من السينمائي».
نيللي كريم: مفيش اختلاف عندي بين العمل الدرامي والسينما
فيما تحدثت نيللي كريم قائلة: «بتعامل مع العمل الدرامي أو السينما زي بعض، مفيش اختلاف عندي بين الاتنين، المجهود واحد، ولكن في الدراما بما إن فيه 30 حلقة أو 15 حلقة بهتم بأدوار الناس التانية، ولا أظن إن فيه حد شال الـ30 حلقة لوحده، عشان كدا لازم كل الشخصية تكون ليها قصة وتكون بشكل حلو، وفي المسرح لما اشتغلت مع كريم عبدالعزيز السنة دي، اشترطت إني أعمل استعراض عشان دي كانت خلفيتي وبدايتي».
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
