يا ترى ايه أسباب ارتفاع الاحتياطي النقدي فى البنك المركزي في الفترة الأخيرة؟ وايه تأثيرده على سوق صرف العملات الجنبية وأزمة شح الدولار؟ والبنك المركزي جاب منين الزيادات اللى حصلت في آخر سنتين واللى وصلت وفقا لرقام رسمية الى أكتر من 13مليار دولار؟ .. كل دي أسئلة مهمة هنجاوب عليها النهارده عشان نفهم إيه اللي حصل لاحتياطي النقد الأجنبي في مصر خلال السنتين اللي فاتوا وإزاي الزيادة دي ممكن تكون طوق النجاة للاقتصاد
في آخر سنتين أرقام أرصدة الاحتياطي النقدي الأجنبي في البنك المركزي المصري زادت بقيمة ضخمة وصلت لـ 13.5 مليار دولار وقفزت من 33.1 مليار دولار في أغسطس 2022 لـ46.7 مليار دولار في نهاية سبتمبر 2024.
الأرقام دي مش مجرد زيادات عادية دي زيادات حصلت على مراحل يعني مثلاً في ديسمبر 2022 وصل الاحتياطي لـ 34 مليار دولار وبعدها في نهاية 2023 وصل لـ 35.2 مليار دولار، لحد ما حقق قفزة في 2024 وزاد بـ 11.5 مليار دولار في سنة واحدة بس ووصل لـ 46.7 مليار دولار
طب ليه الأرقام دي مهمة؟
الحقيقة الاحتياطي النقدي هو الأمان بتاع الاقتصاد.. الاحتياطي دا بيتكون من سلة عملات زي الدولار، واليورو، والين، واليوان الصيني، وده بيخلي الحكومة عندها سيولة بالدولار تقدر تستخدمها في استيراد السلع الأساسية وقت الأزمات أو تدفع أقساط وفوائد الديون.. يعني الاحتياطي مش مجرد رقم بنتباهى بيه دا أداة استراتيجية بتساعد في استقرار الاقتصاد وتحسين الصورة المالية للدولة قدام العالم
حدممكن يسأل ويقول .. وده تأثيره إيه على أزمة نقص الدولار وسوقصرف العملات الأجنبية؟
لو بصينا على تأثير زيادة الاحتياطي على أزمة نقص العملات الأجنبية هنلاقي إن زيادة الاحتياطي معناها إن في قدرة أكتر على توفير السلع الأساسية والمستلزمات الصناعية من بره من غير ما يبقى فيه ضغط كبير على طلب الدولار في السوق.. وده ممكن يقلل من ندرة الدولار ويساعد في استقرار سعره… كمان لما يكون في احتياطي قوي دا بيطمن المستثمرين الأجانب على استقرار الاقتصاد وبيزود من ثقتهم في ضخ استثمارات جديدة.
وفيه عامل تاني مهم هنا .. لما البنك المركزي يقدر يغطي التزاماته الدولية ويحقق استقرار في سعر الدولار دا معناه إن اللي حصل في السوق السودا وارتفاع سعر الدولار بشكل غير طبيعي ممكن يقل تدريجياً لإن السوق هيبقى أهدى والمضاربة على الدولار هتقل.
وهل ليه تأثير على الاستثمارات الخارجية؟
طبعا ليه .. الاستثمارات الخارجية هي كمان هتستفيد من زيادة الاحتياطي المستثمرين بيشوفوا الاحتياطي القوي كدليل على استقرار اقتصاد البلد… وفي مشروع رأس الحكمة اللي وقعت عليه مصر مع الإمارات الحكومة بتتوقع يجذب استثمارات قيمتها تزيد عن 150 مليار دولار منها حوالي 35 مليار دولار كاستثمار أجنبي مباشر.. ودي خطوة كبيرة ممكن تساعد في تخفيف الضغط على العملة وتوفر مزيد من الدولارات اللي الاقتصاد محتاجها بشدة
ومع ارتفاع الاحتياطي النقدي لأعلى مستوياته.. مصر دلوقتي عندها فرصة ذهبية إنها تستغل الرصيد ده لتخفيف عبء ديونها الخارجية .. وكمان لتوفير العملة الصعبة اللي تساعد على تلبية احتياجات السوق المحلي وتثبيت الأسعار.. وكل ما كان عندنا احتياطي قوي هنكون مستعدين أكتر لمواجهة أي أزمة ممكن تحصل في المستقبل خاصة لو قدرنا نحافظ على الوتيرة التصاعدية دي
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
