عصام زكريا في حوار لـ"مصر تايمز": لولا بعض ...

يعد عصام زكريا أحد أبرز الرموز المرموقة في مجال النقد السينمائي واستطاع أن يحقق العديد من النجاحات أيضا بتوليه مهرجانات فنية كبيرة سواء رئاسته لمهرجان الإسماعيلية أو توليه مؤخرا منصب مدير مهرجان القاهرة السينمائي الدولي، أنه عصام زكريا أحد أبرز النقاد السينمائيين الكبار والذي يتمتع بقدر كبير من الثقافة ورؤية فنية ونقدية كبيرة، ويعد من أكثر النقاد الموثوق بآرائه. 

وكان عصام زكريا قد أحدث حالة من الضجة خلال الساعات الماضية؛ وذلك بعد تصريحاته المثيرة للجدل حول عدم رضاءه بشكل كافي عن فعاليات الدورة الـ 45 لمهرجان القاهرة السينمائي الدولي، وتواصل "مصر تايمز" مع عصام زكريا وتحدث عن العديد من التفاصيل الخاصة بالدورة الـ 45 من المهرجان، وإلى نص الحوار. 

ما الصعوبات التي واجهتك في تنظيم المهرجان أثناء الدورة ؟ 

الصعوبات في صناعة المهرجان نفسه يعني هي مسألة مش سهلة، ولابد أن يبقى فيه أفلام كويسة وفيه ضيوف كويسين ويبقى فيه تنظيم كويس ويبقى فيه جمهور، فـ إلى حد كبير أعتقد إننا نجحنا في القصة دي، مسألة إن الحاجة تطلع 100% دي بتبقى طبعا مستحيلة، ولولا بعض المعوقات الداخلية اللي حصلت كان ممكن الدورة تطلع أحسن من كدة بكتير . 

ما مدى رضاؤك على فعاليات الدورة الـ 45 لمهرجان القاهرة السينمائي ؟ 

ده متروك للجمهور هو اللي يحكم، لكن أنا بالنسبة لي إن أنا كان في ذهني وطموحاتي، يعني أقدر أقول نص طموحاتي لأن طموحاتي كانت أكبر من كدة بكتير. 

هل هذا بسبب وجود مشاكل في تنظيم الدورة أم هناك سبب آخر ؟ 

بسبب مشاكل داخلية في المهرجان لكن غير كدة كنا قدرنا نعمل دورة أحسن من كدة كمان بكتير. 

باعتبارك ناقد سينمائي كبير وآراءك موثوق بها من الأفلام الفلسطينية التي عرضت بالمهرجان ما الفيلم الفلسطيني الذي عرض وأثر بدرجة كبيرة بك؟ 

صعب إني أقول فيلم بعينه علشان وأنت بتبرمج بتبقى مش بتفكر إن فيه فيلم أحسن من فيلم، أنت بتختار الحاجات اللي أنت حاسس إنها تستحق المشاهدة، هو ممكن بس برضه هيبان إن أنا بتحيز لفيلم على حساب الأفلام التانية. 

ما تعليقك على الانتقادات التي طالت فيلم وين صرنا للفنانة درة عند عرضه المهرجان والبعض رأى أن الفيلم لا يستحق عرضه بالمهرجان ؟ 

مفيش مشكلة يعني من حق الناس إنها تقول الفيلم يستحق ولا ميستحقش، يعني أنا شخصيا عندي ملاحظات على أفلام بتتعرض في مهرجانات أكبر من كدة زي مهرجان كان مثلا ممكن أتفرج على فيلم وأقول إنه ميستاهلش يدخل المهرجان أصلا. 

ما رأيك بالفيلم عندما شاهدته وهل رأيت أن الفيلم مستواه الفني سئ أم معقول ؟ 

هو الفيلم لا بأس به فنيا، بس بجانب المستوى الفني إحنا عندنا فيلم مصري الإنتاج معمول عن فلسطين وأبناء غزة اللي عايشين في مصر عاملاه ممثلة معروفة ومشهورة وعرض عالمي أول، كل دي حاجات بتتحط في الاعتبار وأنت بتختار الفيلم مش حاجة واحدة، يعني مقدرش أقول عرض عالمي أول لوحده، ولا نقول الفيلم عن فلسطين بس، لا هو فيلم عن فلسطين ومستواه الفني معقول وعاملاه نجمة معروفة بتنتج وتخرج لأول مرة، ف هي مجموعة معايير بتتحط، ممكن الناس تقول ميستاهلش مفيش مشكلة يعني ده رأيهم ومحترم. 

ما سبب عدم عرض فيلم Gladiator 2 بالمهرجان بالرغم من أن كان هناك اتجاه لعرض الفيلم أثناء الدورة ؟ 

لأن الفيلم نزل قبل المهرجان علشان كان لازم العرض الأول في المهرجان، فالفيلم نزل قبل المهرجان بأيام وفي نفس الوقت عرضنا فيلم تاني اسمه Here لتوم هانكس وإخراج روبيرت زيميكس وده كان عرض أول ليه في مهرجان القاهرة، ف إحنا برضه عرضنا فيلم مهم، فيلم Here ده فيلم مهم جدا بطولة توم هانكس وروبيرت زيميكس، ف مش كل الأفلام اللي بنتكلم عليها بنجيبها يعني، دي بتبقى مفاوضات مع أصحاب الأفلام ممكن أعرف أجيبه وممكن معرفش. 

ما تعليقك على منع بعض الممثلين من حضور المهرجان أثناء قيام الدورة وحدوث بعض المشاكل بسبب تلك الأزمة ؟ 

فيه ناس بتيجي مش معاها دعوات ومش مدعوة وبتتطفل يعني بيعتبروا إنهم ممكن يدخلوا من غير تذكرة ومن غير دعوة، وده غلط يعني حتى لو أنت تستحق ف الغلط من إدارة المهرجان إن هي مدعيتكش ولكن مش معنى كدة إن الواحد يجي يحضر من غير دعوة، بس في نفس الوقت المفروض إن الأمن خصوصا إن ده مهرجان سينمائي المفروض إنه يبقى بيتعامل مع الناس بشكل هادي ومفيهوش عنف ولا عصبية. 

أثارت تصريحاتك الأخيرة حالة من الضجة حول عدم رضاؤك عن المهرجان وهناك أقاويل حول انسحابك من منصب مدير المهرجان، فهل لديك نية مؤكدة لترك منصب مدير المهرجان ؟ 

بغض النظر أنه مهرجان القاهرة أو مش مهرجان القاهرة أو أي شغل في أي مكان في الدنيا، إذا المناخ بتاع الشغل غير صحي أنا مبشتغلش فيه، ودي حاجات بديهية إذا جو الشغل الناس فيه نفسيا مش كويسة ومفيش روح التعاون، أنا مبشتغلش في الأجواء دي، مفيش ما يجبرني إني أشتغل في الأجواء دي، ده شغل جماعي وشغل تطوعي إلى حد كبير، وبالتالي لازم المناخ نفسه في البيئة بتاعت العمل لازم تكون بيئة صحية، وأنا مش هشتغل في بيئة فاسدة الناس اللي فيها عندهم مشاكل نفسية وأخلاقية . 

هل قرار انسحابك من منصب مدير المهرجان قرار نهائي أم هناك إمكانية لحل تلك الأزمة ؟ 

لو البيئة بتاعت العمل اتغيرت ممكن أكمل ولو البيئة بتاعت العمل زي ما هي أنا مبشتغلش في الأجواء دي. 

هل حدث تواصل بينك وبين الفنان حسين فهمي بعد تصريحاتك الأخيرة ؟ 

لا مفيش تواصل حصل بيني وبين الفنان حسين فهمي .