يا ترى إيه اللي بيحصل في سوق صرف العملات الأجنبية؟ وليه سعر الدولار بيتحرك بحركة بسيطة لكن متكررة وملحوظة مقابل الجنيه؟ وهل فيه مفاجآت هتحصل الفترة الجاية؟ والأسعار هتفضل ثابتة ولا في تغييرات كبيرة ممكن نشوفها قريب؟
في الأيام الاخيرة الدولار بيشهد ارتفاعات طفيفة لكنها سريعة ووصل لأعلى سعر في بعض البنوك زي مصرف أبوظبي الإسلامي اللي سجل 48.77 جنيه للشراء، و48.85 جنيه للبيع.. وعلى الجانب التاني سعر الدولار في البنك المركزي عند مستوى 48.67 للشراء و48.81 للبيع، وفي بنوك الأهلي المصري وبنك مصر سجل سعر الدولار حوالي 48.71 جنيه للشراء و48.83 جنيه للبيع.. ورغم التغيرات دي رئيس الحكومة مصطفى مدبولي أكد إن حركة النقد الأجنبي منتظمة، وإن مفيش نقص في الاحتياجات الأساسية ولا أي تأخير في توفير المواد الخام ومستلزمات الإنتاج.
مدبولي أكد كمان إن الحكومة ملتزمة تمامًا بسداد التزاماتها من ديون وفوائدها في مواعيدها حتى مع الظروف الاقتصادية الصعبة اللي بتمر بيها مصر.. وقال إن مفيش أي نية دلوقتي لتطبيق تعويم جديد لسعر الصرف وإن الحكومة بتتابع حركة السوق باهتمام بالتنسيق مع البنك المركزي.
أما عن توقعات الأيام الجاية، فالمحللين شايفين إن الدولار والجنيه ممكن يواجهوا تغيرات طفيفة لكن ثابتة خلال الفترة اللي جاية. وكالة "رويترز" بتتوقع إن النمو الاقتصادي المصري ممكن يرتفع بشكل تدريجي ويوصل لـ4% لحد نهاية يونيو 2025 وده بعد تأثير إجراءات التقشف اللي جايبها برنامج صندوق النقد الدولي. المحللين كمان شايفين إن الجنيه المصري ممكن ينخفض شوية بشكل تدريجي ويوصل سعر الدولار لمستوى 50 جنيه مع نهاية السنة المالية 2025 و52 جنيه بحلول 2026.
و في مارس اللي فات وفي إطار الالتزام ببرنامج صندوق النقد قرر البنك المركزي تحرير سعر صرف الجنيه مقابل العملات الأجنبية وتحديدا الدولار ووصل سعر الدولار النهارده لمستوى حوالي 48.75 جنيه.. ومؤسسة زي كابيتال إيكونوميكس شايفة إن فيه فوائد من ضعف قيمة الجنيه بتبان تدريجيا لكن التضخم لازم يقل عشان الناس تقدر تحس بدعم حقيقي للاقتصاد وده ممكن ياخد وقت لحد أول ربع من 2025 على الأقل.
السؤال المهم دلوقتي .. هل الدولار هيكمل في رحلته البطيئة للأعلى مقابل الجنيه؟ وهل هنشوف استقرار نسبي ولا في مفاجآت الفترة الجاية؟ وهل في أمل للتحسن السريع ولا هنفضل على وتيرة ثابتة من التغيرات الطفيفة؟
هنتابع اللى بيحصل فى سوق صرف العملات الجنبية لحظة بلحظة وهنوافيكم بكل جديد وكمان هنقولك اللى بيحصل فى الكواليس.. تابعونا على منصات بانكير المختلفة وهتعرفوا كل جديد
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
