أحمد موسى: الضربة الإسرائيلية لإيران "فرح العمدة" وأمريكا رسمت السيناريو

علق الإعلامي أحمد موسى؛ على الضرب الإسرائيلية التي وجهتها لإيران فجر اليوم واصفا إياها بالمسرحية المرسومة من قبل الولايات المتحدة.

وقال موسى خلال برنامج "على مسؤوليتي" المذاع على قناة "صدى البلد": "اتعودنا على المسرحيات ما بين إسرائيل وأيران، إيران هتضرب فتبلغ وأسرائيل هتضرب فيبعتوا لإيران خلوا بالكم احنا هنضرب ضربة مش هتشمل مناطق النفط ولا مصافي النفط ولا المنشأت النووية".

وأضاف: "إسرائيل شغالة انها هتضرب المنشأت النووية وهتضرب القيادات والمسؤولين شغالين آلة إعلامية خلال الشهور الماضية ومش هنسمح لإيران تمتلك قنبلة نووية تطلع إسرائيل تقولك طلعنا 100 مقاتلة وجهوا تلات ضربات لمنشأت داخل إيران".

وتابع: "لحد اللحظة مفيش فيديو طلع من الفجر لحد دلوقت، الفيديوهات الموجودة ملهاش علاقة بايران لا فيديو إيران طلعوا ولا فيديو مجرم الحرب نتنياهو طلعه ولا صاروخ انضرب ولا منصات انضربت محدش ورانا".

وواصل: "إدارة هذا الامر أمريكا، رسمت سيناريو لإسرائيل متخرجش عنه وقالك لأول مرة إسرائيل تلتزم، الامريكان مش عايزين العالم يشتغل قبل الانتخابات وتاني بقول هيحصل هجوم بعد ذلك على إيران وما قيل إنه هجوم مسرحية متفق عليها بيرتبوها مع بعض لحفظ ماء وجه الكيان الصهيوني أن احنا ضربنا فين النتيجة؟ عايز أقولكم دا فرح العمدة، فرح العمدة بينضرب فيه نار أكتر من ده".

وأكمل: "إيران لما ضربت ضربت قواعد عسكرية داخل إسرائيل وهما قالوا اه انضربنا هي دي الصواريخ والمقاتلات الإسرائيلي والزراع الطولي لإسرائيل وإيران عندها دفاع جوي واس 300 مكانوش يقدروا يضربوا مقاتلة إسرائيلة من الـ 100 اللي طلعوا دول؟".

وأوضح: "إيران طلعت مقاتلات في الجو عشان لو أي هجوم في الجو تواجه طيب ماهي المقاتلات الإسرائيلية ضربت موقعتوهاش ليه؟ هو في حاجة اسمها كده في الحروب؟  مفيش صاروخ طلع كده يجيبلك طيارة وتقول إنك وقعت الطيارة واديت درس للعدو الإسرائيلي".

واختتم: "ايه الحكاية؟ شاغلين العالم وفي الاخر الموضوع فشنك، سيناريو مترتب وشوارع طهران الناس ماشية عادي والعربيات ماشية وقت الضرب هو أنت مش خايف صاروخ يجيلك؟ بيقولك في حرب حرب مين ياعم دا موضوع مترتب ومطار الخميني شغال طيب هو إسرائيل ضربوا ايه؟ حظيرة مواشي والا شوية زرع؟ أين هي الضربات؟ بس الامريكان عايزين دلوقت كده لحين الانتخابات الامريكية وإذا جات كاميلا هاريس هيحصل ضربة للمواقع الإيرانية النووية".