مصر علي طول الزمن معروفة أنها دولة مستهلكة وبتستورد نسبة كبيرة من احتياجات سوقها المحلي، بس الوضع ده اتغير ولسه هتيغير تاني في الفترة الرئاسية الجديدة للرئيس السيسي.. ياتري الحكومة هتحقق ده أزاي..
علي مدار السنين اللي فاتت، مصر كانت بتستورد اغلب احتياجاتها من الخارج، مكانش بيحصل أزمة بسبب حالة الاستقرار السياسي اللي كان عايش فيها العالم كله، لكن الفترة الاخيرة حصلت تغيرات كتيرة جدا غيرت بوصلة العالم كله، وبقي الاستقرار الامني والسياسي قايم في الاساس علي تحقيق الاكتفاء الذاتي من السلع والاحتياجات اللي بيحتاجها السوق المحلي للدول
طيب اية اللي عملته مصر علشان تحقق اكتفاء ذاتي من السلع؟.
من بداية تولي الرئيس عبدالفتاح السيسي لقيادة الدولة المصرية، وهو كان عنده خطة طموحة لتحقيق اكتفاء ذاتي في مصر في كل السلع خصوصا السلع الاستراتيجية زي القمح وغيرها من السلع الزراعية وده اللي كلف بيه الحكومة من اول يوم لوجوده علي راس القيادة السياسية للدولة المصرية.
تكليفات القيادة السياسية علشان نحقق طفرة زراعية نوصل من خلالها لتحقيق اكتفاء ذاتي من السلع بدأت باستنباط اصناف جديدة من التقاوي عالية الانتاجية ويكون محصولها بيندج بدري، وكمان تكون متاقلمة مع التغيرت المناخية اللي موجودة دلوقتي، وكمان التطوير في منظومة دعم الفلاح وتقديم الخدمات الإرشادية وتوفير التقاوي المعتمدة عالية الإنتاجية و مستلزمات الإنتاج من الأسمدة والمبيدات والميكنة الزراعية وبرامج التمويل.
القيادة السياسية كلفت الحكومة كمان بدعم الثروة الحيوانية والداجنة والسمكية، وتطوير مراكز تجميع الألبان، والتوسع في مشروعات الإنتاج الحيواني والسمكي والداجني، وإستكمال جهود التحسين الوراثي للإنتاج الحيواني، ودعم وتحسين مناخ الاستثمار الزراعي وزيادة الفرص الاستثمارية، ودعم إجراءات الإصلاح التشريعي والمؤسسي في قطاع الزراعة .
خطط الدولة لتحقيق الاكتفاء من السلع الزراعية كان لازم لتحقيقها التوسع في مساحة الرقعة الزراعية وده اللي عملته الحكومة، وفعلا نجحنا في إضافة 750 ألف فدان من مشروعات التوسع الأفقي في الدلتا الجديدة ده غير اضافة 460 الف فدان في مشروع تنمية شمال ووسط سيناء، واضافة 1.1 مليون فدان من مشروع تنمية جنوب الوادي توشكى الخير، واضافة 1.5 مليون فدان في مشروع تنمية الريف المصري، وبالمساحات الجديدة دي الدولة رفعت المساحة المزروعة لـ 10 مليون فدان.
وعلشان الدولة تواجه التغيرات المناخية، فلجأ كمان للتوسع في نظام الزراعة المحمية، وبدأت تنفيذ المشروع القومي لإنشاء 100 ألف صوبة واللي من خلاله بقينا نزرع كل الخضروات والفاكهة في غير مواسمها، وبقت اغلب السلع الزراعية موجودة في مصر طول السنة .
وعلشان الدولة تدعم الفلاح، فالدولة بدأت في تطوير منظومة الحيازة الزراعية، وميكنتها وكمان الدولة زودت عدد الحيازات الزراعية لـ 9ملايين فدان، وتحويل صرف الاسمدة لنظام الصرف الالكتروني، واللي بقي موجود لأكتر من 2 مليون مزارع، ده غير زيادة عدد التقاوي المعتمدة لمحصول القمح لتغطية الاحتياجات المحلية، وكمان بنستهدف تطوير نسبة منه للخارج في 2025.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
