ايه حكاية مليارات الدولارات اللي هتدخل مصر في الفترة الجاية وازاي هضيف لرصيد مصر الدولاري وهترفع شأن الجنيه المصري.
في الوقت اللي فيه موارد مصر زادت من أكتر من قطاع زي السياحة واللي حققت موسم استثنائي بإيرادات 15 مليار دولار تقريبا رغم الظروف اللي في المنطقة ولولاها كان الرقم هيكون أكبر من كده بكتير وزيادة الصادرات المصرية غير البترولية ل40 مليار دولار وقفزة تحويلات المصريين لأكتر من 23 مليار دولار وزيادة التدفقات الاستثمارية في كل القطاعات وتوطين الصناعة اللي وفر دولارات كتير لكن فيه مشروعات وموارد تانية لما تدخل الخدمة هتجيب لمصر مليارات الدولارات كل سنة.
أول المشروعات دي هو عودة الملاحة لقناة السويس اكتر مما كانت وزي ما احنا عارفين إن القناة فقدت اكتر من 60% من إيراداتها قبل اندلاع الصراع في الشرق الأوسط والتهديدات الحوثية في البحر الاحمر وبالارقام قناة السويس حققت طفرة في إيراداتها قبل الأزمة ووصلت لـ10.5 مليار دولار وكانت هتوصل ل13 مليار دولار في 2024 لولا الأحداث الأخيرة زي ما قال الرئيس السيسي وفقدت قناة السويس حوالي 7 مليار دولار..
ومع صمود الهدنة الأخيرة ورغبة جميع الأطراف في أنهاء الصراع بدأت الشركات العالمية تستعد للعودة الى قناة السويس بقوة والتوقعات بتقول إنه هيحصل هجوم ملاحي على قناه السويس من شركات النقل البحري الدولية واللي عانت من ارتفاع التكلفة بعد تحويل اتجاه السفن لرأس الرجاء الصالح.
المفاجأة إن قناة السويس مش هترجع بكامل قوتها وبس دي كمان راجعة بمشروع جديد وهو ازدواج وتوسيع المدخل الجنوبي الممر الملاحي عشان السفن تعدي في اتجاهين بطول المجري الملاحي ودا هيقلل زمن العبور اكتر واكتر ومع عودة الملاحة بالشكل دا منتظر قناه السويس تعدي الرقم اللي قاله الرئيس السيسي وهو ال13 مليار دولار وبحسبة بسيطة الدولة هيدخلها بين 7و9 مليار دولار كانت ضايعة بسبب الأحداث.
تاني مشروع هيدخل لمصر مليارات الدولارات هو مشروع المتحف المصري الكبير ودا نقدر نقول عليه مشروع القرن في القطاع السياحي لأن العالم كله مستنية وهيحقق حسب توقعات شركات السياحة والسفر طفرة في حجم تدفقات السياح في السوق المصري وهيديه ميزة خاصة من بين الأسواق السياحية في المنطقة والعالم.
ومتوقع تحقيق طفرة في إيرادات السياحة مع افتتاح المشروع في الصيف اللي جاي واللي متوقع يكون افتتاح مبهر والعالم كله هيتابعه على الهواء مباشره وهيساعد في وصول مصر لمستوى 30 مليار دولار في السنة في القريب العاجل ومشروع المتحف الكبير مع المشروعات التانية اللي بتم في قطاع السياحة هينقل القطاع لمتسوى غير مسبوق في تاريخ مصر من حيث الحجم والإيرادات.
المشروع الأخير اللي هيقلب شكل الاقتصاد المصري هو مشروع الضبعة النووي ودا لأنه هيقود قطاع الطاقة في مصر والمنطقة وهيغير خريطة الساحل الشمالي كله وهيزرع فيه العمران ومناطق صناعية ضخمة ومجتمعات زراعية وتجارية ومصر جديدة هتقوم حوليه وهيكون عامل أساسي في النمو الاقتصادي الضخم اللي مصر بتخطط ليه.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
