ليه سعر الدولار في مصر مستقر اليومين دول؟ وهل ده معناه إن الاقتصاد المصري ماشي في الاتجاه الصح؟ ويا ترى الدولار وصل لكام النهارده؟
في الفترة الأخيرة اكيد حضراتكم ملاحظي إن سعر الدولار قدام الجنيه المصري بقى مستقر بشكل ملحوظ.. النهارده سعر الدولار بيتراوح ما بين 50 جنيه و30 قرش و50 جنيه ونص.
طيب، إيه الأسباب اللي ورا الاستقرار ده؟ خلينا نبص على كذا عامل وأولها سياسات البنك المركزي المصري.. البنك المركزي لعب دور كبير في استقرار سعر الصرف من خلال سياسات نقدية حكيمة.. ورفع أسعار الفايدة كان واحد من الإجراءات دي.. واللي ساعدت في السيطرة على التضخم وزيادة الثقة في الجنيه المصري.
كمان استقرار سعر الصرف تم من خلال تحسن إيرادات السياحة.. القطاع السياحي في مصر شهد انتعاش ملحوظ في النصف الأول من 2024. إيرادات السياحة بتعتبر مصدر مهم للعملة الصعبة، وده ساهم في توفير الدولار وتخفيف الضغط على ميزان المدفوعات.
وده طبا مع زيادة تحويلات المصريين في الخارج..المصريين المغتربين لعبوا دور كبير في دعم احتياطي النقد الأجنبي من خلال التحويلات النقدية وده ساعد في تأمين استقرار سعر الصرف.
ده بجانب ان الحكومة مستمرة في تنفيذ إصلاحات هيكلية لتحسين مناخ الاستثمار وجذب الاستثمارات الأجنبية وده بيدعم استقرار الاقتصاد وسعر الصرف.
بالإضافة لكده وكالة "ستاندرد آند بورز" أكدت التصنيف الائتماني السيادي لمصر عند مستوى "B-/B" مع نظرة مستقبلية إيجابية، وده بيعزز ثقة الأسواق في استقرار الاقتصاد المصري.
كمان البنك المركزي المصري أبقى على أسعار الفايدة من غير تغيير في الاجتماعات الأخيرة، وده جزء من السياسة النقدية اللي بتهدف للسيطرة على التضخم وتحقيق استقرار الأسعار.
وبالنسبة للاحتياطي النقدي البنك المركزي المصري أعلن ارتفاع احتياطات النقد الأجنبي الصافية في مصر إلى 47.109 مليار دولار في ديسمبر عند أعلى مستويات تاريخية لها، مقابل 46.952 مليار في نوفمبر 2024.
ووفقا لبيانات المركزي المصري بلغت الزيادة في الاحتياطيات نحو 157 مليون دولار خلال ديسمبر الماضي.
وبيتكون الاحتياطي النقدي في مصر من احتياطي الدولة من الدهب وعوائد قناة السويس وحصيلة الصادرات المصرية وتحويلات المصريين العاملين بالخارج.
في النهاية الاستقرار اللي حصل لسعر الدولار كان نتيجة لمجموعة من العوامل اللي بتعكس تحسن في الأداء الاقتصادي لمصر ومع استمرار السياسات دي التوقعات إيجابية لاستمرار الاستقرار في سوق العملات خلال الفترة الجاية وده بيعزز جاذبية الاستثمار في مصر.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
