يا ترى إيه هي المفاجأة اللي هتعلنها الحكومة للشعب المصري، هل هتكون زيادة معاشات وحوافز جديدة، ولا ترقيات ومسابقات وظايف ورعاية طبية، طب لو في فعلا أخبار سعيدة هتعلن امته، وهل هتكون لكل الناس ولا لفئات معينة؟
في الحقيقة، فعلا في إجراءات كتيرة عملتها الحكومة المصرية في الفترة الأخيرة، وقررت كمان تعزز منها أو تزودها في الأيام الجاية، وكلها متعلقة بإجراءات الحماية الاجتماعية ودعم العمالة والأسرة الغير قادرة.
عشان كده، الدكتورة مايا مرسي وزيرة التضامن الاجتماعي، قالت إن الدولة بتضمن توفير خدمات التأمين الاجتماعي، ولكل مواطن غير متمتع بنظام التأمين الاجتماعي، فله الحق في الضمان الاجتماعي.
ومؤخرا وتحديدا الأسبوع اللي فات، وافق البرلمان على قانون الضمان الاجتماعي الجديد اللي أصدرته الحكومة، واللي هيشكل نقلة نوعية في نظام الحماية الاجتماعية في مصر، وهيقدم يقدم الخدمة لكل مواطن مستحق.
ومش بس كده، لأ ده كمان الدولة رفعت مخصصات الإنفاق العام على برامج الحماية الاجتماعية ل 635.9 مليار جنيه في موازنة العام المالي 2024/2025، ودي هتشمل الدعم الغذائي، والتأمين الاجتماعي والصحي، والإسكان الاجتماعي، وبرامج التحويلات النقدية.
يعني عندك مثلا، معاشات "تكافل وكرامة" اللي هي أكبر برنامج نقدي مشروط في المنطقة، واللي بتهدف لتحسين أوضاع الأسر الأشد فقراً، فارتفع عدد المستفيدين منها عشان يوصل ل 4.7 مليون أسرة، و500 ألف أسرة بالتعاون مع المجتمع المدني، وده سجل حوالي 22 مليون فرد بتكلفة 41 مليار جنيه.
ده طبعا بجانب برامج التمكين الاقتصادي اللي أفادت 1.3 مليون أسرة، وكان رأس مال البرنامج ده 5 مليارات جنيه.
ومن ضمن إجراءات الحماية الاجتماعية كمان، إصدار قانون التأمينات الاجتماعية والمعاشات رقم 148 لسنة 2019 لتطوير ورقمنة أنظمة التأمينات الاجتماعية وضمان حقوق العاملين في القطاع غير المنظم، وبالفعل تم إطلاق شهادة "أمان" في سنة 2018، واللي بتوفر الحماية التأمينية للعمال الموسميين وغير الرسميين.
كمان، الدولة قدمت الدعم للعمالة غير المنتظمة، وصرفت لهم 6 مليارات و261 مليون جنيه، منها صرف 500 جنيه على 6 دفعات للعمالة غير المنتظمة المتضررة من أزمة كورونا، وكمان عملت صندوق لدعم العمالة غير المنتظمة ضد المخاطر المختلفة وقدرت توفر أكتر من 14 ألف فرصة عمل للأشخاص ذوي الإعاقة خلال الفترة من يناير 2023 لحد يوليو 2024.
وحاليا، الدولة بتفكر توسع قاعدة الدعم أو الحماية الاجتماعية وتضم أسر جديدة لمعاشات "تكافل وكرامة"، وكمان منح العمالة غير المنتظمة.
وده غير أخبار سارة تانية جاية للموظفين وأصحاب المعاشات، واللي هتكون في شكل حزمة حماية اجتماعية جديدة هتعلنها الحكومة الأيام الجاية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
