ياترى سوق الذهب رايح على فين بعد تنصيب ترامب رسميا رئيسا للولايات المتحدة وايه علاقة أمريكا بسوق الدهب العالمي وايه انعكاس دا على السوق المصري والاسعار في الصاغة.
كل الأسواق العالمية من نفط ودهب وسلع وشركات بتنتظر ظهور سياسة الرئيس الأمريكي الجديد ترامب واللي تم تنصيبه رسمياً من ساعات وسبب القلق في كل الأسواق العالمية هو ان الاقتصاد الأمريكي هو اللي بيحدد اتجاهات الأسواق دي ومش هتبالغ لو قلنا إنه هو اللي بيقودها ودا لأسباب كتير جدا منها إن الاقتصاد الأمريكي هو الاقوى في العالم وتاني حاجة أن الولايات المتحدة بتملك أهم سلاح في الاقتصاد والتجارة الدولية وهو الدولار عملتها الرسمية والعملة المعتمدة دوليا في التعاملات الدولية والأسواق وفي احتياطات الدول النقدية وفي التمويلات الدولية واكتر من 60% من احتياطيات العالم النقدي من الدولار ودا غير أن الولايات المتحدة عندها شركات مخيفة بتسيطر على اغلب الأسواق وخاصة التكنولوجية والطاقة والتصنيع ودا غير قوتها العسكرية العسكرية واللي بتخدم على قوتها الاقتصادية طبعا وعلى نفوذها العالمي وهي الدولة الوحيدة اللي بتقدر تفرض عقوبات على الدول التانية باستخدام أدوات قوتها المالية وفي مقدمتها الدولار.
طيب ايه علاقة أمريكا بسوق الدهب العالمي ؟
زي ما قلنا إن الولايات المتحدة عندها الدولار اللي بيتتحكم فيه بالأسواق العالمية وزي ما احنا عارفين إن الدولار ماشي عكس الدهب يعني لو سعر العملة الأمريكية ارتفع سعر الدهب في العالم بينزل والعكس صحيح ولأن ترامب جاي ورافع سيف الدولار وإعلنها صراحة أن سياسته بتعتمد على تقوية الدولار اكتر واكتر يعني قيمة وسعر الدولار هيزيد بشكل كبير جدا ولو دا حصل أسعار الدهب هتنزل في المقابل بنفس نسبة صعود العملة الأمريكية وعشان كده بمجرد إعلان فوز ترامب في الانتخابات الأخيرة انخفض سعر الدهب عالمياً بحوالي 8% بعد ما سجل مستوى قياسي خلال 31 أكتوبر اللي فات مع تسارع الخسائر بعد إعلان فوز ترمب الأسبوع الماضي.
وكمان بمجرد فوز ترامب تراجعت رهانات صناديق التحوط على صعود الدهب إلى أدنى مستوى ليها ودا قلل الطلب على المعدن الاصفر. باعتباره ملاذ آمن وكمان تزامن فوز ترامب مع إعلانه عزمه على إنهاء الصراع في الشرق الأوسط ودا حصل فعلا وشفنا الهدنة الأخيرة ولأن التوترات الجيوسياسية كانت سبب اساسي في ارتفاع الدهب في الشهور اللي فاتت فالطبيعي إن سعر الدهب ينزل تاني في الأسواق العالمية وضيف على كل الاسباب اللي فاتت إن سعر الدهب زاد في الفترات الأخيرة بسبب مخاوف من تراجع المؤشرات الاقتصادية الأمريكية لكن المخاوف دي بعد وصول ترامب تلاشت مع خططه الاقتصادية اللي ناوي يعملها وتعهده بتقوية الاقتصاد الأمريكي اكتر واكتر.
يعني ببساطة قوة الدولار وانتهاء الصراعات الدولية وتحسن المؤشرات الاقتصادية للولايات المتحدة كلها عوامل هتخفض من سعر الدهب في الأيام الجاية ومش هتوصل لمستوى 3 آلاف دولار زي ما توقعت اغلب المؤسسات المالية الدولية قبل وصول ترامب واكيد دا هيكون ليه تأثير مباشر على سعر الدهب في الصاغة المصرية لانها مرتبطة بالسعر العالمي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
