مصر حاليا بقت هدف أولي للاستثمارات العربية خصوصا دول الخليج العربي واللي دخلوا وحطوا استثمارات كبيرة في مشروعات كتيرة.. فياتري ايه سر اهتمام الدول العربية بالدخول في مشروعات وشراكات في مصر.. واية اللى مصر هتستفيدوا من المشروعات دي؟
في الفترة اللي فاتت الحكومة عملت جهود كبيرة أوي علي الأرض لجذب رؤوس الأموال والاستثمارات الأجنبية للسوق المصري، والتعديلات التشريعية اللي قامت بيها مصر في الفترة اللي فاتت والحوافز اللي قدمتها الدولة خلت رؤوس الاموال وشركات الاسثتمار الأجنبية والعربية بيدورا علي أي فرصة للدخول للسوق المصري، خصوصا أن الحكومة قدمت كل التسهيلات المتاحة واللي هتمكنهم من بناء وإنشاء المصانع وكمان هيقدروا يصدروا منتجاتهم وصناعتهم بكل سهولة ويسر، وده بسبب أن مصر ليها علاقات تجارية واقتصادية وسياسية مع عدد كبير من دول العالم، وبالتالي كل اسواق العالم بقت متاحة ومفتوحة قدامهم للتصدير.
مصر خلال الكام شهر اللي فاتوا قدرت تجذب نسبة كبيرة من استثمارات صناديق الاستثمار العربية وصلت قيمتها لأكثر من 20.9 مليار دولار في الربع الأخير من 2024 .. وكانت ابرز العقود اللي وقعتها مصر مع صناديق الاستثمار العربية السنة اللى فاتت صفقة الاستثمار السياحي في منطقة راس الحكمة واللي وصلت عوائدها المباشرة لـ35 مليار دولار ده غير الوظايف الكتيرة اللي هيقدمها المشروع للعمالة المصرية اللي هتشتغل في المشروع سواء كانت بشكل مباشر أو غير مباشر .
الشراكات المصرية العربية هتتضمن كمان طرح ما يقرب من 5 مناطق استثمارية علي راسهم منطقة راس بناس واللي الحكومة حاليا بصدد طرحها للاستثمار السياحي علي المستثمرين زي ما حصل في منطقة راس الحكمة، خصوصا أنها منطقة مميزة ومشهورة بالسياحة البحرية، ومنطقة مفضلة للغواصين والسياح اللي عايزين تجربة بحرية مميزة
منطقة راس بناس بتتميز كمان بالشعاب المرجانية الصحية، وبتعتبر موطن للعديد من انواع الأسماك النادرة، وكمان مكان أمن للطيور المهاجرة ودي كلها مميزات هتخلي كل المستثمرين نفسهم يدخلوا يبنوا مشروعات استثمارية سياحية فيها .
الدولة بتهدف من عمليات الطرح المختلفة للاستثمار السياحي والبيئي جذب الاستثمارات المحلية والأجنبية للدخول للسوق المصري، وتوفير بيئة ملائمة للمستثمرين، وه جزء من استراتيجية الحكومة المصرية لتعزيز النمو الاقتصادي وتوفير فرص عمل جديدة للشباب.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
