يا ترى إيه حجم الاستثمارات العربية اللي دخلت مصر الفترة الأخيرة؟ ومين أكتر دول عربية ضخت فلوس في مصر؟ وايه القطاعات اللي يتحدى باقبال كبير من المستثمرين العرب؟ وليه مصر بقت وجهة للاستثمارات دي؟ والأهم إزاي ده هيأثر علينا كلنا؟
وفقا لاحصاءات حديثة ..في الربع الأخير من السنة المالية اللي فاتت مصر استقبلت صافي تدفقات استثمارية مباشرة من الدول العربية وصلت لـ 20.9 مليار دولار.. وده رقم مش بسيط أبداً.. الرقم ده لو قارنّاه بالاستثمارات اللي دخلت مصر على مدار السنة اللي فاتت كلها اللي كانت حوالي 4.3 مليار دولار.. هتلاقي إننا بنتكلم عن قفزة ضخمة في الاستثمارات.
طب مين اكتر دول عربية ضخت فلوس في مصر؟
الإمارات العربية المتحدة كانت صاحبة نصيب الأسد.. استثمارات الإمارات في قطاع الإنشاءات لوحده شكّلت 95.3% من إجمالي الاستثمارات الوافدة لمصر خلال السنة اللي فاتت.. الرقم ده وصل لـ 37.5 مليار دولار، وده مقارنة بـ 1.7 مليار دولار في السنة اللي قبلها.
طب ليه الإمارات؟ وليه قطاع الإنشاءات بالتحديد؟
الإجابة ببساطة.. صفقة "رأس الحكمة".. مصر والإمارات وقعوا الصفقة دي في فبراير اللي فات باستثمارات قيمتها 35 مليار دولار.. منها 24 مليار دولار تم توجيههم لتطوير مشروع رأس الحكمة.. والباقي تم تحويله من ودائع إماراتية للبنك المركزي إلى استثمارات مباشرة في مشاريع كبيرة في كل أنحاء مصر.
طيب إيه أهمية الخطوة دي؟
المحللين بيقولوا إن صفقة زي "رأس الحكمة" مش بس عززت الموارد الدولارية لمصر.. لكنها كمان كانت رد سريع على التحديات الاقتصادية .. زي تراجع إيرادات قناة السويس.. ومش بس كده الاتفاق ده كان لبه تأثير مباشر في رفع صافي تدفقات الاستثمار الأجنبي المباشر في مصر للـ 46.1 مليار دولار خلال العام المالي اللي انتهى في يونيو 2024
طب هل الاستثمارات دي هتفضل مستمرة بنفس المعدل؟
التقارير بتقول إن التدفقات دي استثنائية وصعب تتكرر بنفس الحجم السنة الجاية.. لكن ده مش معناه إن مفيش أمل.. السعودية مثلاً رفعت استثماراتها في مصر خلال الربع الأخير بـ 221.3 مليون دولار وقطر زادت استثماراتها بحوالي 141.4 مليون دولار.. وده بيأكد إن العرب لسه شايفين فرص كبيرة في السوق المصري.
ووفقا للخطة المعلنة فالحكومة المصرية مستهدفة جذب 30 مليار دولار استثمارات أجنبية مباشرة في السنة المالية الحالية فلازم مكون جاهزين ونعرف هل هنقدر نحافظ على الزخم ده وهل الاقتصاد المصري هيقدر يتحول لمركز إقليمي للاستثمارات الأيام الجاية هي اللي هتجاوب.. لكن المؤكد دلوقتي إن مصر ماشية بخطى واضحة ورقم زي 20.9 مليار دولار هو رسالة قوية لأي مستثمر بيفكر في السوق المصري.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
