التعليم هيبقي رقمي وبرمجة وذكاء اصطناعي وهيتم ربطه كمان بسوق العمل.. إيه اللي هيحصل في مصر مع النظام الجديد وإيه هي توجيهات الرئيس السيسي الجديدة.
النهاردة الرئيس عبد الفتاح السيسي اجتمع مع الدكتور مصطفى مدبولي رئيس الحكومة والدكتور أيمن عاشور وزير التعليم العالي والبحث العلمي ومحمد عبد اللطيف وزير التربية والتعليم والتعليم الفني ونقدر نقول إن دا من الاجتماعات المهمة جدا لأنها حددت مسار مستقبل التعليم في مصر خلال السنين الجاية.
طيب ايه اللي حصل في الاجتماع؟
شوف حضرتك في البداية خلينا نأكد إن كل الدول اللي نهضت وحققت الرخاء والتقدم والرفاهية كان التعليم هو كلمة السر فيها ومعانا اليابان وكوريا الجنوبية وأوروبا كلها كأمثلة وأي دولة فيها تعليم حقيقي وعلمي لازم يحصل فيها نهضة اقتصادية وثقافية واجتماعية وعشان كده العالم المتقدم بيعتير التعليم افضل استثمار في حياة الدول والحكومات لأنه تعليم بيخلق كوادر جديدة قادرة إنها تقود الاقتصاديات وفي نفس الوقت تقدر تعمل نهضة عملية في كل القطاعات.
ولو عاوز تعرف سر تاني عن تقدم الدول اللي قلنا عليها فهنقول لحضرتك إن الدول دي ربطت بين التعليم وبين سوق العمل بمعني إنها بتشوف سوق العمل رايح على فين وبيتطور إزاي وبناء عليه بتوجه التعليم لتخريج كواد قادرة تتعامل وتستوعب السوق الجديد وهنضربلك مثل مهم جدا عشان نبسطها لحضرتك .. دلوقتي أوروبا وأمريكا بالذات متقدمين في موضوع تكنولوجيا الذكاء الاصطناعي ودا عشان اهتموا بتعليم ومناهج البرمجة في الكليات اللي عندهم والبرمجة مجالها كبير جدا وبتشمل التطبيقات والحلول الرقمية واللي بتعتمد عليها قطاعات اقتصادية كبيرة زي صناعة الهواتف الذكية والمدفوعات المالية وتكنولويجا الذكاء الاصطناعي والنتيجة الدول دي بقي عندها الاف من الطلاب في تخصصات البرمجة واللي قدرت تدفع بيهم في سوق العمل الجديد وقدروا بيهم يحتكرو تكنولوجيا هتتحكم في العالم كله في الشهور والسنين الجاية.
نرجع بقي لاجتماع الرئيس النهاردة واللي اصدر توجيهات جديدة سبق وأكد عليها وهي ربط التعليم بسوق لعمل الجديد والحديث وخاصة في تخصصات البرمجة والتكنولوجيا الرقمية والهندسة والذكاء الاصطناعي لأن دي أسواق المستقبل ومصر لازم تحجز فيها مكان وطبعا مصر مش هتبدأ من الصفر لأن فيها كليات بتطلع مبرمجين وعندها نوابغ فعلا لكن الرئيس يقصد هنا التعليم بشكل عام في مصر لازم يروح ناحية سوق العمل الحديث عشان الانطلاقة الاقتصادية من ناحية وتوفير فرص عمل مجزية للشباب المصري مطلوبة في العالم كله.
كمان الرئيس بيخطط لأن مصر تكون مركز في علوم البرمجة ووحش تكنولوجي في المجالات العلمية الحديثة ومصر عندها عباقرة في كل التخصصات دي وفي كتير منهم في شركات عالمية يعني مصر عندها فرصة إنها تنطلق في سوق العمل المتطور وتحتكر وتطور تكنولوحيا هتغير موازين القوى والاقتصاد.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
