إيه اللي بيحصل في شرق بورسعيد وايه حكاية مدينة نيرك الصناعية وإزاي مصر هتتحول لمركز صناعة القطارات والمترو في المنطقة.
معروف إن مصر تاني دولة في العالم يكون عندها سكة حديد بعد بريطانيا وكان لازم مصر تكون على قد تاريخها العريق في القطاع ده تحديدا وكلنا عارفين بردو حجم الإهمال اللي كان في منظومة السكة الحديد والقطارات وفاكرين الحوادث المروعة اللي كانت بتحصل بسبب قدم القطارات وانعدام الصيانة وتهالك مرافق في هيئة السكك الحديدية ولما وصل الرئيس السيسي للحكم كلف الفريق كامل الوزير رئيس الهيئة الهندسية بالقوات المساحة ساعتها بتطوير منظومة السكة الحديد وبعدها تولي حقيبة وزارة النقل.
واي حد منصف عارف حجم التطوير اللي حصل في منظومة السكة الحديد في مصر في كل المناحي من قطارات ومحطات والتطوير في الأساليب التكنولوجية الحديثة في تنظيم سير القطارات والتحكم والإشارات وكل دا تم في وقت قياسي وإنجازات الوزير في السكة الحديد موقفتش عند تطوير وتحديث شبكة السكك الحديدية القديمة لكن نقدر نقول أنه أضاف ليها شبكة جديدة من الالف للياء بخطوط جديدة بتوصل لأول مرة مناطق جديدة بأنحاء الجمهورية من مطروح غربا العريش شرقا وربط المواني بشبكة تالتة من خطوط القطارات.
كامل الوزير موقفش بردو عند تطوير وتوسيع شبكة السكك الحديدية بكل تفاصيلها لكن قرر أن مصر تتحول لمركز عالمي في إنتاج القطارات وعربات المترو وقطع غيارها ووقف التصدير ودا طبعا إنجاز مكانش حد هيصدقه من فترة قريبة لأن إنتاج عربات القطارات الحديثة كان حكر على الدول الصناعية المتقدمة ولأن مصر شغالة بخطة توطين الصناعات قدر كامل الوزير يوقع بروتوكولات مع كبرى الشركات العالمية المتخصصة لتصنيع القطارات ولوازمها في مصر.
من المناطق اللي انشأتها الدولة لتصنيع القطارات الحديثة بكل أنواعها مدينة “نيرك” بشرق بورسعيد واللي بتشهد تصنيع أول قطار حديث في يوليو الجاي باستخدام أحدث تكنولوجيا كورية جنوبية وفرتها شركة هيونداي روتيم ودا وفق صفقة أبرمتها نيرك مع هيونداي روتيم بقيمة 660 مليون دولار ومش بس كده دا مدينة نيرك بتخطط كمان لإنتاج قطارات المونوريل، والقطارات السريعة، والقطارات الكهربائية الخفيفة بالشراكة مع عدد من الشركات العالمية.
طيب ايه هي مدينة نيرك دي؟
شوف ياسيدي مدينة نيرك دي هتكون قلعة لتصنيع القطارات والمترو في مصر والشرق الأوسط وبدأت بشركة تكونت من مجموعة من شركات القطاع الخاص المصرية بالشراكة مع جهات حكومية.
والهدف الرئيسي من تأسيس الشركة هو إنشاء مجمع صناعي لصناعات السكك الحديدية في مصر، وخاصة الوحدات المتحركة بالجر الكهربائي، على مساحة حوالي 300 ألف متر مربع في المنطقة الصناعية بشرق بورسعيد المنطقة الاقتصادية لقناة السويس كمرحلة أولي وباقي المراحل بتهدف لجذب كبرى شركات تصنيع وسائل النقل السككي في العالم وتحويل المدينة لمركز للتصنيع والتصدير للشركات دي لدول المنطقة وعشان كده بتسعى شركة نيريك لتعميق وتوطين صناعة السكك الحديدية بعمق في مصر والاستفادة من الخبرات العالمية في هذا المجال ونقلها للأيدي العاملة المصرية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
