مصر عندها خطة لتنويع مصادر الطاقة في الفترة اللي جاية وهيكون الاعتماد بشكل كامل علي مصادر الطاقة الجديدة والمتجددة، وواحد من الحاجات اللي هيكون الاعتماد عليها بشكل رئيسي هو الهيدروجين الاخضر.. ياتري الدولة بتخطط للحتة دي أزي.. واية خطة مصر للاستثمار في الهيدروجين الأخضر.
في الفترة الحالية مصر عندها استراتيجية كبيرة لتنويع مصادر الطاقة، خصوصا ان الاعتماد علي المصادر التقليدية في توليد الكهرباء بيكلف الدولة مبالغ كبيرة جدا، ووصل معد التوفير اللي الدولة بتوفره شهريا من ترشيد استهلاك الانواع المختلفة من الوقود الأحفوري اللي بيستخدم في تشغيل محطات توليد الكهرباء لـ1.2 مليار جنية شهريا .
علشان كده الدولة اتجهت للاعتماد علي وسائل الطاقة الجديدة والمتجددة علشان تكون بديل أمن ومستدام بدلا من الوقود الاحفوري واللي هو عبارة عن البترول والمازوت والغاز الطبيعي اللي بيستخدم حاليا لتشغيل محطات توليد الكهرباء.
طيب اية هيا خطة الدولة للاعتماد علي مصادر الطاقة الجديدة والمتجددة؟.
مصر حاليا بتستهدف الوصول إلى نسبة 42% من الطاقة المتجددة علي الشبكة الموحدة للكهرباء بحلول 2030 والخطة بتستهدف الوصول لـ65% من أجمالي الطاقة المستهلكة بحلول 2040، وحاليا الدولة بتستهدف تقليل معدلات الفقد من خلال إدخال أنظمة بطاريات التخزين واللي بدأ تشغليها لأول مرة في مصر علشان تكون بديل أمن وفعال لاستمرار الطاقة في أوقات ارتفاع الأحمال، والهدف طبعا من الشغل ده كله هو تقليل استهلاك الوقود.
الدولة في الفترة اللي فاتت وجهت نسبة كبيرة من الاستثمارات لمشروعات الطاقة الشمسية وطاقة الرياح، وخصصت مساحة 42 ألف كيلومتر مربع للنوع ده من المشروعات، وكمان الدولة إصدرت قوانين لتشجيع الاستثمار في الطاقة المتجددة والهيدروجين الأخضر.
طيب ازاي الدولة هتسفاد من الاستثمار في الهيدروجين الأخضر لتأمين الكهرباء ؟.
مصر حاليا عندها خطة أنها تكون الدولة الأولي في العالم في إنتاج وتصدير الهيدروجين الأخضر منخفض التكاليف، والهيدروجين الأخضر ده هيكون بديل مثالي للوقود اللي الدول بتتستخدمه حاليا لتشغيل المولدات والسفن، وهيكون ارخص وبيحافظ علي البيئة وكمان بيحافظ علي العمر الافتراضي للمحركات، وحاليا مصر بتستهدف جذب استثمارات بقيمة 15 مليار دولار للمرحلة التجريبية لمشروعات إنتاج الهيدروجين الأخضر في الفترة ما بين عام 2025 ولحد 2030، ومصر هتبدأ تنفذ المرحلة الأولي لتنفيذ مشروعات الهيدروجين الأخضر في النصف الأول من 2025، وفعلا الحكومة خلال الفترة اللي فاتت عملت أكثر من اجتماع مع خبراء واستشاريين ومسؤولين بعد وضع الضوابط والقواعد المنظمة للمشروعات علشان يوصلوا لصيغة نهائية لمشروعات توليد وتشغيل الهيدروجين الأخضر.
الاجتماعات اللي عقدتها الحكومة في الفترة اللي فاتت كان أغلبها مع شركات سكاتك وأكواباور وإنفنيتي باور وإيمياباور و أوكيور إنيرجي وتحالف شركة طاقة عربية وفولتاليا وكلهم الحكومة وقعت معاهم اتفاقيات تفاهم علشان الشركات دي تبدأ تنفذ مشروعات استثمارية في مشروعات توليد وبيع الهيدروجين الأخضر .
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
