عبر الإعلامي أحمد موسى عن استيائه من فصل الدكتور سيد البدوي رئيس حزب الوفد السابق من الحزب بعد تصريحاته أمس خلال استضافته على ببرنامج "على مسؤوليتي".
وقال موسى خلال برنامج “على مسؤوليتي" المذاع على قناة "صدى البلد": بنتكلم يا جماعة خلوا الإعلام يقابل الناس والرأي الآخر يبقى موجود، وتجد حالات لا يمكن تحدث وإمبارح كان مشرفنا الدكتور السيد البدوي كبير العائلة الوفدية واتكلم إمبارح على الحياة السياسية والحزبية، وهذا البرنامج مفتوح للجميع لكل الأصوات ما عدا جماعة الإخوان الإرهابية".
وأضاف: "عندما يتحدث الدكتور السيد البدوي عن شأن يتعلق بحزب الوفد وهو مين مش صعبان عليه حزب الوفد؟ مش من النهاردة من سنوات، الوفد حكم مصر وشكل حكومة وأدار في فترات تاريخية للبلد وإزاي يصل بينا الحال النهاردة مش عايزين نسمع بعض".
وتابع: "حزب الوفد العريق اليوم يطلع يتكلم دكتور السيد البدوي كلمتين، الراجل بالمناسبة كل اللي قاله عن الوفد ميزدش عن دقيقتين هل له حق يتكلم؟، هل في مشاكل في الحزب يتكلم عنها؟ طيب ليه يا جماعة النهاردة مش عايزين حد يتكلم؟ ليه الدكتور عبد السند يمامة مش عايز حد يتكلم؟ دا انتوا بتقولولنا إدونا مساحة عندما تأتي المساحة تبهدلوا الناس؟".
وواصل: "حضراتكم متخيلين افتحوا يا جماعة مساحة نفتح مساحة والمساحة مفتوحة، متقفلتش ولما أجد النهاردة الدكتور سيد البدوي يطلع معانا وتاني يوم يفصل من حزب الوفد اللي كان رئيسه، طلع الرأي الآخر متحملناهوش؟ طيب بتعتبوا على الآخرين ليه؟ حزب الوفد المعارض مش قادر يتحمل كلمتين؟ مش قادر يتحمل نقد؟".
وأكمل: "ازعل أنه مجرد كلمتين اتقالوا دقيقتين انتقاد كلمتين اتقالوا من دكتور سيد، مهو انتقد الحكومة والا إنتوا عايزين تبقوا ديكتاتوريين، يا دكتور عبد السند من فضلك يا فندم اللي اتعمل ده لا يليق بتاريخ حزب الوفد، دا حضرتك رجعت الدكتور سيد سنة 2022، وتيجي النهاردة تفصله عشان كلمتين؟".
وذكر: "أخاطب العائلة الوفدية قيادات حزب الوفد العريق يا جماعة اللي بيحصل داخل الحزب ده لا يليق أبدا، يا دكتور عبد السند من فضلك النهاردة محتاجين كل واحد".
