إلى وزارة التعليم.. نجحتم لكن مطلوب..

العام الدراسى ٢٤ / ٢٥ هو عام تاريخى فاصل للتعليم.. اجراءات انضباطية كتير تم اتخاذها.. لكن عدلت جزء كبير من المسار التعليمى وابرزها وأهمها هو عودة الطلاب للمدارس من جديد.. بعيدا عن الهجوم الفيسبوكى الذى تعرضت له كثير من قطاعات العمل التعليمى.. لكن الاجمالى يقول الوزارة نجحت كتير.. حتى لو فيه اخطاء وتم تعديلها.. احنا مش ملايكة جايه من السما.. مش ح نقدر نرضى الكل  لكن الحمد لله استطعنا ارضاء الاغلبية  .. وشكرا لكل منظومة العمل التعليمى..

الترم الثانى الكل ح يكون اتعود والكل ح يكون اخد الترم الاول نموذج له يشتغل على خطواته..
الوزارة تبذل مجهود صعب مع ٢٥ مليون طالب وكل نوعية تعليم لها مطالب.. الوزارة نجحت فى حاجات كتير..

- عودة الطلاب ونسبة حضور فعلى تتجاوز ٨٥% فى صفوف النقل.
- الوزارة نجحت فى سد العجز من اول يوم ولأول مره ف تاريخها يحصل ده.
- الوزارة نجحت فى تشجيع العمل بالحصة وزيادة اجر الحصة إلى ٥٠ ج.
- الوزارة نجحت فى جذب الطالب إلى المدرسة.
- الوزارة نجحت إلكترونيا فى تفعيل مواقع التعليم الالكترونى.
- الوزارة نجحت فى جذب الاسرة والمجتمع.

دا اللى يخصنى انا ولى الأمر والمعلم.. أما الأمور الأخرى فلها من يتحدث عنها.. لكن مطلوب من الوزارة أمور أخرى هامة:-

١- سيادة الوزير يجب أن يبحث عن الاجراءات المطلوبة لزيادة دور التعليم الخاص فى التعليم 
مصر محتاجه ٦٠ الف فصل سنويا لاستيعاب الطلاب الجدد.. ايه دور التعليم الخاص فى المشاركة للتخفيف عن الدولة.. ما هى الاجراءات المطلوبة لتشجيع التوسع فى عدد المدارس الخاصة وزيادة فصول المدارس الحالية.

٢- الوزارة لديها عجز فى عمال النظافة والاداريين. ماذا حدث من إجراءات حتى تاريخه.

٣- الوزارة عندها عجز ٣٠٠ الف معلم..بخلاف المعاشات اللى بتطلع يوميا.. ليه م نعملش مطالبة للحكومة اننا عايزين ١٠٠ الف معلم على الأقل فى مسابقة واحدة.. لأن العجز يتزايد يوميا ومش بيقل.. و١٠٠الف معلم دفعة واحدة ح تفرق معانا تاريخ يعمل ايجابيات كتير بعيدا عن التعليم..ومعلمى الحصة لا يوجد عليهم مسؤوليات أساسية رئيسية سوى حصصهم فقط..
وفقكم الله..