في الفترة الأخيرة وزارة التموين استقبلت شكاوى من بعض المواطنين بخصوص توقف بطاقات التموين بتاعتهم وده معناه إنهم مش هيقدروا يصرفوا عيش كل يوم ولا تموين الشهر، طب يا ترى إيه سبب توقف البطاقة، هل لها مدة صلاحية معينة بتنتهي وعشان كده لازم تتجدد، ولا ده معناه إن صاحب البطاقة مابقاش مستحق إنه ياخد تموين.. هنقولك كل التفاصيل في التقرير ده.
دايما المصريين بيهتموا بأخبار التموين وتحديدًا البطاقات، خاصة بعد ما الحكومة أعلنت في الأيام الأخيرة، عن إيقاف عدد من البطاقات، وده لأنها قررت تغربل الدنيا عشان توصل الدعم التمويني لكل شخص بيستحقه فعليا.
ولكن وسط الغربلة دي، اشتكى عدد من المواطنين من توقف بطاقاتهم، وتوجهوا لأقرب مديرية تموين لهم، وطلبوا يعرفوا السبب، هل تم إستبعادهم وأصبحوا غير مستحقين، ولا خطأ فني في البطاقة نفسها وهيرجعوا يصرفوا تاني.
من هنا ردت وزارة التموين والتجارة الداخلية، في خطابها لمديريات التموين على مستوى الجمهورية، وأكدت إن لو بطاقتك وقفت، ففي شوية شروط لازمة عشان تقدر تفعلها من تاني.
وأكدت كمان، إن ممكن يكون سبب التوقف ده، هو وجود مستحقات وأقساط مالية متأخرة على الأسرة صاحبة البطاقة، يعني راجع نفسك كويس.
طب إزاي تحل المشكلة دي، وترجع البطاقة تصرف زي الأول؟
بص يا سيدي عشان ترجع تشغل بطاقتك، فلازم حضرتك تسدد المبالغ المالية المستحقة على أقساط شهرية منتظمة، كمان ممكن تقسط المبالغ دي على مجموعة شهور.
بس لازم تلتزم بالسداد وتقدم تعهد كتابي بيفيد التزام حضرتك بسداد الأقساط المستحقة كل شهر، لأن في حالة عدم الالتزام بسداد الأقساط في المواعيد المقررة، هيتم إعادة النظر في استمرار تشغيل التموينية من الوزارة، يعني بطاقتك ممكن تقف تاني وماترجعش تصرف مستحقاتك من الدعم.
كمان، من أسباب توقف بطاقتك التموينية، هو سرقة الكهربا، ولكن مؤخرا وزير التموين أعلن إن تم إعادة عمل جميع البطاقات التموينية اللي اتوقفت بسبب ممارسات متعلقة بالتيار الكهربائي مع استثناء الحالات اللي بيتم فيها رفع دعوى ضد أصحابها، وده معناه إن التوقف هنا بيكون مؤقت لحد ما يتم إصدار حكم قضائي في القضايا المحررة ضد صاحب البطاقة.
ضيف على كل ده، إن أي شخص بيتم إثبات براءته من التهم اللي اتوجهت له، ليتم عودة عمل البطاقة التموينية المتوقفة فور صدور الحكم النهائي.
يعني الموضوع بسيط وسهل والحكومة كمان هتتعاون معاك وتديك حقك، بس أنت خليك في السليم.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
