الأمريكان مرعوبين..'عصا بريكس" اللي هتاكل ...

يا ترى ايه حكاية عملة بريكس الموحدة؟ وايه تأثيرها على قوة ونفوذ الدولار عالميا؟وإيه اللي هيحصل لو الدولار مابقاش هو العملة المسيطرة في العالم؟ وهل فعلاً إحنا على أعتاب مرحلة اقتصادية جديدة بتقلب موازين القوة النقدية؟ وإيه اللي بيحصل مع دول مجموعة بريكس؟ وإزاي العملة الموحدة اللي بيحلموا بيها ممكن تغير اللعبة؟.. لو عاوز تعرف التفاصيل كلها شوف الفيديو ده للآخر.

في الساعات اللي فاتت وخلال اجتماعات القمة الـ 16 لمجموعة بريكس المنعقدة في روسيا تداولت وسائل الإعلام صور للرئيس الروسي فلاديمير بوتين وهو شايل عملة بريكس المرتقبة في إيده.

المشهد ده أثار جدل كبير في الإعلام ووسط المتابعين والناس بدأت تتساءل"هل دي بداية نهاية عصر الدولار كعملة أساسية؟

العملات اللي ظهرت في الصور ديه كانت محط تكهنات كتيرة.. وبعض وسائل الإعلام وصفتها إنها مجرد عملة تذكارية للقمة لكن في جهات تانية خاصة في الإعلام الروسي، قالت إن العملة دي مش تذكارية خالص وإن دول بريكس بتحضر لإطلاق العملة الموحدة دي قريبًا كبديل للدولار في التعاملات بين الدول الأعضاء في التحالف.

لكن المفاجأة اللي أعلنها الرئيس بوتين كانت إن رغم تداول الصور ديه مافيش تأكيد لحد دلوقتي إن العملة ديه هتطرح في الأسواق قريباً.

بوتين قال بوضوح إن الدول الأعضاء في مجموعة بريكس لسه شغالة على توحيد الإطار القانوني للاتفاق وإن الموضوع هيحتاج وقت قبل ما نشوف العملة دي فعلاً في التعاملات الاقتصادية الدولية.

طب إيه هي مجموعة بريكس دي أصلاً وليه بتفكر في عملة موحدة؟

المجموعة دي اللي بتضم دول زي روسيا، الصين، الهند، جنوب إفريقيا، والبرازيل، واضيف ليهم دول تانية زي مصر والسعودي  بتمثل قوى اقتصادية عملاقة في العالم وكل دولة فيهم بتحاول تقلل اعتمادها على الدولار في التعاملات الدوليةوالسبب الأساسي هو التحديات اللي بتواجهها الدول دي في ظل هيمنة الدولار الأمريكي على النظام المالي العالمي وخاصة العقوبات الاقتصادية اللي بتهدد التعاملات التجارية الدولية.

وفكرة إن يبقى فيه عملة موحدة بين دول المجموعة ممكن يكون هدفها الأساسي هو تقليل الاعتماد على الدولار كوسيط وده هيديهم حرية أكبر في تحديد سياساتهم المالية والاقتصادية من غير ما يبقوا متأثرين بمواقف اقتصادية أو سياسية دولية زي اللي بتحصل مع الدولار.. وخير دليل اللي عملتوا امريكا مع روسيا بعد غزو أوكرانيا والعقوبات اللي فرضتها على موسكو وازاي استخدمت الدولار كسلاح

لكن هل عملة بريكس دي هتشوف النور قريب؟

وفقًا للتصريحات اللي خرجت من القمة الموضوع لسه في طور المفاوضات والدول لسه بتشتغل على التفاصيل القانونية والتنظيمية اللازمة علشان العملة دي تكون جاهزة للتعاملات

والرئيس الروسي بوتين قال إن إطلاق العملة الموحدة ديه مش هيحصل بشكل عاجل لكن الفكرة قائمة بقوة والكل متفق على أهمية إنهم يتخلصوا تدريجيًا من الاعتماد على الدولار.

في النهاية هل هيكون لعملة بريكس الموحدة تأثير حقيقي على الاقتصاد العالمي؟ وهل فعلاً هتقدر تنافس الدولار وتكسر هيمنته؟

كل ده هنعرفه خلال الأيام الجاية.. هنتايع مع حضراتكم كل جديد في الملف ده

لكن الواضح دلوقتي إن التحالف ده بيشتغل بجدية على إنه يقلب موازين اللعبة الاقتصادية العالمية