هو إيه قصة المشروع الصيني الجديد اللي بيتم تنفيذه في منطقة القنطرة غرب أو المنطقة الاقتصادية، وايه علاقته بقناة السويس، هل هو حيلة اقتصادية جديدة لزيادة إيرادات القناة ولا مشروع تجاري هدفه الربح للشركة الصينية.. هنقولك كل التفاصيل في الفيديو ده فتابعنا للآخر.
فو متابع الاخبار هتعرف إنه في الساعات الأخيرة، وليد جمال الدين، رئيس الهيئة العامة للمنطقة الاقتصادية لقناة السويس، شهد مراسم تدشين حجر أساس مشروع شركة "هينيواي" الصينية، المتخصصة في تصنيع أمتعة السفر.
والمشروع الصيني ده هيتنفذ على مساحة إجمالية تبلغ 120 ألف متر مربع، بإجمالي استثمارات أولوية بتصل ل 50 مليون دولار أمريكي، وهيوفر حوالي 3000 فرصة عمل.
عشان كده، قال رئيس الهيئة العامة للمنطقة الاقتصادية لقناة السويس، إن منطقة القنطرة غرب الصناعية بتمثل انعكاس واضح لإرادة الدولة المصرية وخطط اقتصادية قناة السويس، يعني من حيث تحسين البنية التحتية وتوفير مناخ جاذب للاستثمار.
عشان كده، تم تطوير منطقة القنطرة غرب الصناعية عشان تضم في المرحلة الأولى 9 مشروعات في مجالات مختلفة، زي المنسوجات والأقمشة، والغزل والنسيج، والملابس الجاهزة، والأجهزة الطبية، والملابس الرياضية، والصناعات الغذائية إلى جانب مشروع أمتعة السفر.
وبالفعل، تم التعاقد في الفترة الأخيرة على 6 مشروعات منها بإجمالي استثمارات 271 مليون دولار، على مساحة 614 ألف متر مربع، وده هيقدر يوفر أكثر من 12 ألف فرصة عمل، وكمان جاري التعاقد على الـ 3 مشروعات تانية.
أما بالنسبة لمشروع "هينيواي"، فهو بيضيف إلى سجل تعزيز التعاون بين المنطقة الاقتصادية لقناة السويس، والاستثمارات الصينية، واللي تخطت الـ 3 مليارات دولار لحد دلوقتي، وكمان المشروع جه بيعتبر فرصة كبيرة لتعزيز مكانة مصر كمركز صناعي وتجاري في المنطقة وفي المجال ده.
كل ده بجانب، إن المشروع هيوفر 3000 فرصة عمل جديدة زي ما قولنا ، وده بيعتبر من الأهداف التنموية الأساسية اللي بتسعى اقتصادية قناة السويس لحقيقها.
كمان، المنطقة الاقتصادية بتساعد وتدعم وبتوفر كل الحوافز الاستثمارية والاتفاقيات الدولية، عشان تشجع الشركات لبدء المشروعات بتاعتها في أسرع وقت، وبتقدم لها كل التسهيلات الممكنة، لكن نقدر نقول إن مشروع شركة هينيواى، قادر على تحقيق الأهداف المرجوة من خلال دعم المنطقة الاقتصادية لقناة السويس، خاصة وأن شركة هينيواى الصينية هي من أكبر شركات صناعة حقائب السفر في العالم، ومن بين عملائها الرئيسيين كبرى العلامات التجارية في هذا المجال ومنها Samsonite و Delsey و Swiss Gear و Travelite.
عشان كده، من المخطط بدء إنشاء المشروع في يناير 2025، والتشغيل الرسمي هيكون في ديسمبر 2025، يعني نقدر نقول إن المشروع ده هيجي من وراه ملايين الدولارات اللي هتنعش الخزينة المصرية بالعملة الأجنبية من ناحية، وكمان تعزز إيرادات المنطقة الاقتصادية لقناة السويس من ناحية تانية عشان تقدر تعوض وتعزز إيرادتها.
وأخيرا، المشروع ده رغم إنه بسيط إلا أنه هيساهم بشكل كبير في لفت أنظار الشركات العالمية للمنطقة دي، واللي ممكن تتحول لمنطقة صناعية واستثمارية قريب جدا.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
