اسعار الدهب في مصر رجعت ترفع تاني بعد انخفاض ملحوظ في سعر الاعيرة، ياتري اية سبب الأرتفاع ده.. وسعر الذهب هيقفل السنة علي كام ولو هتستثمر في الدهب تعمل إيه.. خليكم معانا للآخر وهتعرفوا التفاصيل في الفيديو ده.
اللي متابع لحركة الصاغة هيعرف أن اسعار الدهب رجعت ترفع تاني وبزيادة كبيرة، والزيادة دي جت بعد ما الاسعار انخفضت بشكل كبير خلال الكام يوم اللي فاتوا ووصل معدل الانخفاض في سعر عيار 21 واللي هو اكتر أنواع الدهب انتشارا في مصر وخصوصا في القري ومحافظات الصعيد لأكثر من 100 جنية كاملة، وده رقم كبير جدا.
اللي متابع لسعر المعدن الأصفر هيعرف أن الدهب في العادي بيلعب في حدود 20 أو 30 جنية ما بين الزيادة والنقص، ولو زاد غير كده بتكون لاسباب خارجية.
طيب اسعار الدهب حاليا وصلت لكام؟.
الدهب حاليا في مصر رجع وارتفع بدرجة كبيرة وسعر الجرام بعد ما كان في مستوى اقل من 3700 جنية، رجع وارتفع مرة تانية وحاليا سعر الجرام 21 ارتفع بنسبة كبيرة وحاليا مسجل 3750 جنيه للشراء، والدهب علي مدار ايام السبت والاحد اللي فاتو ارتفع باكتر من 50 جنية كاملة للجرام.
طيب اية هيا اسباب ارتفاع الدهب في مصر خلال اليومين اللي فاتوا؟.
شعبة الدهب قالت أنه في اسباب كتيرة لعودة ارتفاع اسعار المعدن النفيس في مصر وارتفاعها بشكل عالمي، وأول الأسباب دي هيا ارتفاع حده التوترات اللي موجودة حاليا في اكتر من منطقة حولين العالم، وطبعا التوترات دي لها تاثير مباشر علي اسعار الطاقة.
تاني سبب لارتفاع اسعار الدهب بشكل عالمي هو العودة القوية للدولار، وده بعد انتخاب الرئيس الامريكي السابق دونالد ترامب لولاية جديدة في الولايات المتحدة والوعود اللي اخدها بعودة الدولار لقوته ومكانته اللي كان عليها قبل كده، ومن يوم الوعود دي والدولار كل يوم في الطالع، ده غير الوعود بالجمارك الكبيرة جدا اللي هيفرضها علي بضائع الدول اللي مشاركة في تجمع البريكس، وده علشان يحد من السيطرة المتوقعة لدول التجمع خصوصا أن التجمع ده هدفه الاساسي هيا القضاء علي سيطرة الدولار في حركة التجارة العالمية.
تالت سبب لارتفاع اسعار الدهب في مصر هو قرب انتهاء مدة شهادات 27%، واللي هتكون مع بداية 2025، واللي جاية مع التوقعات الكتيرة والمنتشرة واللي بترجح أن لجنة السياسات النقدية بالبنك المركزي هتاخذ قرار بتخفيض اسعار الفايدة في مصر في الأجتماع اللي جاي واللي هيكون برضوا مع بداية السنة الميلادية الجديدة.
الكلام المنتشر ده عن وجود تخفيض قريب لأسعار الفايدة، خلت ناس كتيرة من المواطنين يتجهوا لشراء الدهب ويبعدوا عن الاستثمار في الشهادات خصوصا أن محدش عارف اية اللي هيحصل فيها في الايام اللي جاية، ياتري هتفضل زي ما هيا ولا هيحصل تخفيض لأسعار الفايدة، والكلام ده خلي في اقبال كبير جدا من الناس علي شراء المعدن الأصفر وده واحد من اهم اسباب عودة ارتفاع اسعار الدهب في مصر واللي بيعتبر ملاذ آمن للمصريين في أي توتر في الأسواق ولو بتفكر تستثمر في الدهب فدا الوقت المناسب ولسه الفرصة قايمة لأن كل التوقعات بتقول إن الدهب رايح في حتة تانية وهيرفع عالمياً لمستوى 3 آلاف دولار للأوقية ودا معناه زيادات كبيرة في أسعار الدهب محليا
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
