الحكومة أعلنت من فترة عن بدء طرح المطارات قدام القطاع الخاص للدخول في إدارتها، ومؤسسة التمويل الدولية سملت الحكومة قايمة بالمطارات اللي هتكون متاحة لدخول القطاع الخاص.. ياتري الحكومة هتبدا تشتغل في النقطة دي علي مطارات اية .. وموضوع الطرح هيمشي إزاي
من كام يوم مؤسسة التمويل الدولية اللي الحكومة تعاقدت معاها كاستشاري لموضوع برنامج الطروحات الحكومية سلمت الحكومة قائمة باسماء المطارات اللي هتكون جاهزة للطرح قدام القطاع الخاص، واللي هيدخل في تشغليها وادارتها في الفترة الجاية بما يضمن توفير الخدمات السياحية للمسافرين ويحقق استراتيجية الدولة بالوصول الي 30 مليون سائح بحلول 2030.
طيب اية هيا المطارات اللي مؤسسة التمويل الدولية حددتها للحكومة للدخول في الطرح؟.
مؤسسة التمويل الدولية حددت للحكومة 20 مطار مختلف علي مستوي محافظات الجمهورية للطرح قدام القطاع الخاص للدخول في الادارة والتشغيل وقائمة المطارات دي ضمت مطار القاهرة الدولي وده بيعتبر المطار المركزي الأولي للتشغيل في مصر، واللي بتكون عليه اكبر ضغط في حركة تشغيل الرحلات والركاب .
الحكومة بدأت دراسة القائمة اللي اعدتها المؤسسة لطرح المطارات قدام القطاع الخاص واختارت 4 مطارات كبداية للطرح وهما مطارات القاهرة الدولي وسفنكس غرب القاهرة والعلمين الجديدة، وأن في مطارات تانية هيتم طرحها في الفترة اللي جاية قدام القطاع الخاص وهتضم مطاري الأقصر وأسوان واللي بيكون عليهم تشغيل موسمي في موسم السياحة الشتوي .
الحكومة قالت أن الطرح هيكون لإدارة وتشغيل المطارات ومش هيكون طرح للأصول، وهيستهدف التعاقد مع شركات الإدارة العالمية المتخصصة في تشغيل المطارات الدولية، واللى هيكون لها سوابق أعمال في المطارات المختلفة ولها قدرة على التسويق والترويج ودي حاجة المطارات المصرية مفتقدها حاليا.
الحكومة كملت كلامها وقالت أن عملية الطرح على القطاع الخاص بتستهدف صنع الطلب ودعم نمو حركة السياحة الوافدة لمصر بالتزامن مع استراتيجية استهداف جذب 30 مليون سائح بحلول 2028 ومضاعفة الطاقة الفندقية العاملة من 450 الي 500 ألف غرفة في 2030 .
الحكومة شايفة كمان أن طرح إدارة المطارات المصرية من قبل شركات عالمية هيحفز شركات كبرى في مناطق مختلفة من العالم على تسيير رحلات مباشرة إلى مطارات مصر خاصة من أميركا ودول أوروبا شرق آسيا، وهيساهم كمان في تحفيز التدفق السياحي لمصر من أسواق جديدة ده غير نمو حركة الشحن الجوي .
طيب مصر عندها كام مطار اصلا علشان تطرح 20 مطار قدام القطاع الخاص ؟.
مصر حاليا بتمتلك 23 مطار ده غير مطار القاهرة الدولي واللي هو الأكبر والرئيسي في حركة التشغيل، وبتستهدف الوصول بعدد الركاب سنويا إلى 72.2 مليون راكب بنهاية العام اللي جاي مقارنة مع 66.2 مليون راكب في نهاية السنة اللي فاتت، والخطة المستقبلية بتستهدف الوصول إلى 110 ملايين راكب سنويا بنهاية عام 2030.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
