هو إيه اللي بيخلي الناس تستلف من شركات تمويل بتدي تسهيلات بشروط صعبة وفوايد مرتفعة؟ وليه فيه ناس بتلجأ للشركات دي رغم إنها بتقدم فوايد عالية وشروطها ممكن تكون سبب في حبس ناس مع إن البنوك فوايدها أقل وبتهوّن كتير في موضوع القروض؟ وإيه اللي بيخلي العميل يستسهل ياخد قرض سريع، مع إن الطريق ده بيبقى مليان مخاطر؟ وإيه الفرق بين إنك تلجأ لشركة تمويل أو تروح للبنك؟.. في الفيديو ده هنقولك شركات التمويل بتلعب على إيه ؟ وإيه اللى لازم تاخد بالك منه وليه البنوك خيار آمن وأقل تكلفة كمان
في الفترة الأخيرة شركات التمويل الاستهلاكي بقت بتنتشر بسرعة جدا في مصر خصوصاً في الأماكن اللي فيها الفئات محدودة الدخل زي الأرياف فى القرى والنجوع.. والشركات دي بتقدم تسهيلات شكلها من بره مريح وسهل.. بس الحقيقية إن التعامل معاها بيحمل مخاطر كبيرة ممكن ما تكونش ظاهرة للعميل في البداية.. وخلينا نقولك على أهم المشاكل اللي بتواجه الناس مع الشركات دي.
أول وأكبر مشكلة بتواجه الناس اللى ببتعامل مع شركات التمويل الاستهلاكي هي الفوايد العالية.. الشركات دي بتفرض فوايد بتوصل لمستويات مرتفعة جداً مقارنة بالبنوك.. يعني، مثلا لو البنوك بتقدّم قروض بفوايد معقولة وتتناسب مع قدرات العملاء الشركات دي ممكن توصل الفايدة لضعف النسبة دي.. وده معناه إنك هتدفع مبلغ أكبر بكتير من اللي استلفته وده استنزاف لميزانية البيت ومخاطرة كبيرة بتنسف أى مشروع قبل ما يبدأ وعشان كده بنسمع ونشوف حالات تعثر كتيرة حوالينا وناس بتدخل السجن وبيوتها حرفيا بتتخرب
وتانى مشكل هي شروط السداد القاسية.. وعلى عكس البنوك اللي بتدي فترات سداد أطول الشركات دي مش بتهتم بقدرتك على السداد.. وبالتالي بتفرض شروط صارمة جدا وكتير من العملاء اللي بيتأخروا عن السداد بيلاقوا نفسهم مضطرين لدفع غرامات ضخمة أو حتى يتعرضوا للحبس.. وده لأن الشركات دي مش عندها نفس الالتزامات القانونية والرقابية زي البنوك اللي بتهتم بحقوق العميل أكتر.
وتالت مشكلة بتواجه العميل اللى بيتعاون مع شركات التمويل هي عدم وجود رقابة حقيقية عكس البنوك مثلا اللى دايماً تحت رقابة البنك المركزي لكن الشركات دي بتشتغل بتسهيلات قانونية أكتر ومعظمها بيبقى هدفه الربح السريع من الفوايد المرتفعة مش خدمة العملاء وحمايتهم وبالتالي مفيش قوانين واضحة بتفرض عليهم حماية العميل زي البنوك.
كمان عدم وضوح الشروط واحد من أهم مشاكل الشركات دي اللي غالبا بتبقى حريصة إنها ما توضّحش تفاصيل الاتفاق كويس للعميل.. يعني ما بيشرحوش تكلفة الفايدة الفعلية ولا الغرامات .. وده بيخلي العميل يمضي على عقد ممكن يبقى فيه شروط غير عادلة أو حتى غير قانونية.. وده اللي بيوقع ناس كتير في مشاكل هم مش متخيلينها في الأول
وخد بالك الشركات دي مش سهلة خالص وبتركز على الفئات الأقل وعي مالي وبتستهدف دايما فئات من الناس اللي معندهاش وعي مالي كافي وخصوصا اللي في المناطق الريفية.. هما بيشوفوا إن العميل ده بيدور على أسرع حل وبيستغلوا احتياجه بدون ما ينبهوه للمخاطر بعكس البنوك اللي دايماً بتتطلب وجود مستشار مالي معاك عشان يفهمك التزاماتك.
نيجي للسؤال الأهم .. ليه البنوك أفضل ليك كعميل في التعامل؟
لو فكرنا بعمق ومصلحة هنلاقي إن البنوك بتوفر أمان أكتر للعميل لأسباب كتير أهمها الفايدة الأقل .. وده لأن البنوك بتحاول تساعدك تكون قادر تسدد القرض بسهولة وعشان كده الفوايد فيها أقل بكتير وكمان شروط قانونية عادلة لأن البنوك بتتبع قوانين تحمي العميل من الغرامات القاسية وده بيديك راحة نفسية إنك مش مهدد بأي عقوبة.. بالاضافة لحاجة مهمة وهي ان البنوك بتديك استشارات تساعدك تاخد القرار الصح وتقدر ميزانيتك.
فى النهاية قبل ما تفكر تاخد قرض من شركة التمويل فكّر في المخاطر دي كويس واعرف إن الطريق الآمن دايماً بيكون مع البنوك اللي بتوفر لك حماية أكتر وبتعتبرك شريك مش مجرد مصدر ربح.. وده يفسرلك ليه البنوك بتطمن وبتاخد اجراءات تكون عارفة من خلالها ان العميل هيقدر يسدد القرض ويكبر مشروعه لأن البنوك مش مؤسسات ربحية وبس دي مؤسسات ليها دور وطنى مهم فى دعم الاقتصاد وزيادة الانتاج
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
