فاكرين أهل الشر كانوا بيقولوا إيه على العاصمة الإدارية الجديدة وقت الإعلان عن المشروع وازاي حاولوا يشككوا في الدولة والنظام.. ايه اللي حصل في العاصمة الإدارية النهاردة وايه حكاية التريليون جنيه وازاي الرمل بقى دهب.. خليكم معانا للآخر وهتعرفوا التفاصيل.
أول ما الرئيس السيسي أعلن عن حاجة مصر الملحة لعاصمة إدارية جديدة تخفف الضغط على القاهرة وتكون على مستوى عواصم العالم المتقدم منصات أهل الشر والتحريض لقتها فرصة عشان تشكك الناس في النظام والدولة وقالت إن الرئيس ييرمي فلوس المصريين في حتة صحرا رغم إن الدولة مدفعتش مليم أحمر في العاصمة الإدارية الجديدة ودا لأن التمويل كله كان من الشركات اللي هتبني المشروعات والدولة حققت أرباح ضخمة كمان من عائد بيع الأراضي للشركات واللي بقالها تمن بعد ما كانت صحرا وبنت بيها المباني الحكومية الجديدة يعني الدولة كسبت من المشروع ومخسرتش قرش واحد.
طيب ليه بنتكلم النهاردة عن العاصمة الإدارية الجديدة ؟
عشان من شوية خالد عباس، رئيس مجلس الإدارة والعضو المنتدب لشركة العاصمة الإدارية للتنمية العمرانية ACUD، كشف إن قيمة الأصول المملوكة لشركة العاصمة ارتفعت لأكتر من تريليون جنيه حضرتك متخيل الرقم قد ايه تريليون جنيه يعني قد ميزانية مصر 4 مرات في سنة 2011.
يعني مشروع العاصمة الإدارية الجديدة كان استثمار ناجح مليون في المية زيه زي مشروع قناة السويس الجديدة اللي نفس المنصات حاولت تشوهه وقالت إن المصريين ضيعوا فلوسهم على مشروع خسران لكن التجربة قالت إن إيرادات قناة السويس اتضاعفت بسبب القناة الجديدة ومرور انواع جديده من السفن لاول مرة مع التوسعة وتقليل زمن المرور في المجري الملاحي.
نرجع لمشروع العاصمة الإدارية الجديدة واللي كان سبب لخير. كتير للبلد وفوايد ملهاش عدد أولها نبه المستثمرين الأجانب والعرب لأهمية الاستثمار العقاري في مصر وكمان أن مصر تقدر تعمل اي مشروع ضخم بدون تكلفة على الموازنة العامة ومشروع العاصمة هو اللي أنعش تجارة تصدير العقار في مصر وهو اللي جاب مشروع رأس الحكمة وشجع الشركات العالمية على توطين علاماتها التجارية في مصر وهو اللي خفف الحمل على العاصمة القديمة والدولة استفادت من ناحية تانية لما استثمرت في المباني الحكومية في القاهرة اللي انتقلت للعاصمة الإدارية وتحويلها لمشروعات تانية زي فنادق او مقار لشركات عالمية أو طرحها في برامج الطروحات الحكومية وحققت من وراها مليارات الدولارات.
النهاردة مشروع العاصمة الإدارية بيكتب شهادة نجاح جديدة للدولة المصرية والقيادة السياسية اللي نفذت المشروع بدري جدا وخلقت روح جديدة من التحديث والتطور وخلقت مجتمعات عمرانية جديدة وحولت الصحراء لكنز بمليارات الدولارات وفتحت شرايين جديدة في الاقتصاد المصري ودا أفضل رد على منصات الفتنة والتحريض.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
