الجمعة، 29 نوفمبر 2024 09:21 م 11/29/2024 9:21:40 PM
وجهت الإعلامية لميس الحديدي تعليقا مثيرا على تصريحات الدكتور مصطفى مدبولي رئيس الوزراء بشأن ارتفاع سعر الدولار في مصر خلال الفترة الأخيرة، وربطها بانتهاء الانتخابات الرئاسية الأمريكية.
وقالت الحديدي عبر حسابها على منصة «إكس»: «بعيدًا عن نظرية علاقة اقتصادنا بالانتخابات الأمريكية البعيدة جدًا.. الحقيقة ان كلنا عاوزين (طاسة) الخضة القديمة بعد ما لامس الدولار الخمسين جنيه ولا نعلم إلى أين!».
وأضافت: «كلنا مخضوضين.. بدءًا من المستثمر الأجنبي اللي عاوز يفهم الدولار رايح فين، والمستثمر المصرى اللى مش عارف يحسب التكلفة، وصولًا إلى وزير المالية اللى المفروض يبقى مفزوع لأن عليه التزامات وديون وسلع أساسية وبترول بالدولار».
وتابعت الحديدي: «أخر حاجة بقى المواطن.. ده بقى عدّى مرحلة الخضة من كتر اللى شافه.. لأنك عارف طبعا يا دكتور إننا دولة مستوردة تقريبًا لكل حاجة حتى البيض.. يعنى كل زيادة في الدولار هي زيادة في الأسعار وأى انخفاض فيه لا يعني أبدا خفض للأسعار.. وبعد كل ده قولِّى مش عاوزنا نتخض؟، طب إزاي؟».
تصريحات رئيس الوزراء
رد رئيس الوزراء على الأنباء المتداولة والتوقعات بشأن وجود تحركات في سعر صرف الدولار الفترة المقبلة أو تخطيه الـ50 جنيهًا.
وقال مدبولي خلال مؤتمر صحفي من ميناء دمياط، عقب تدشين أول رحلة لخط الرورو المصري الإيطالي، مساء الخميس، إن الحكومة ملتزمة بسعر صرف مرن، مؤكدًا أنه لا تقييد لأسعار الصرف.
وأضاف أن الدولار ارتفع أمام كل عملات العالم، إذ أصبح قويًا بعد الانتخابات الرئاسية الأمريكية أمام كل العملات سواء الاسترليني أو اليورو، وبالتالي الجنيه المصري جزء من المنظومة العالمية.
وتابع رئيس الوزراء: «طبيعي يحصل هذه النوعية من الحركة، وتاني بقولها، مانتخضش إن يبقى فيه زيادات، وبعدها ممكن يرجع تاني».
