إزاي ممكن مصر تتخطى أزمة الدولار وتراجع إيرادا قناة السويس؟ وهل ممكن نشوف بدائل حقيقية لتعويض خسارة إيرادات القناة؟ وهل هتستمر أزمة الدولار في الضغط على الاقتصاد المصري؟وهل احنا ماشيين فى الطريق الصحيح ولا لأ؟
فيه ناس لما يتكلموا لازم نسمع لهم باهتمام ونعرف افكارهموتصوراتهم لخروجمصرمن أزماتها ومن الناس دي المصرفي المخضرم هشام عز العرب، الرئيس التنفيذي للبنك التجاري الدولي.. واللي أدلى بتصرحات مهمة مؤخرا حوالين الوضع الاقتصادي الحالي في مصر والأزمة المستمرة بسبب نقص الدولار.
عز العرب أكد إن مصر عندها حلول بديلة لمواجهة تراجع إيرادات قناة السويس اللي اتأثرت بشكل كبير بالفترة الأخيرة نتيجة للأزمات الجيوسياسية.. وقال انه بيشوف إن مصر عندها شوية حلول تقدر تعوض بيها تراجع الإيرادات قناة السويس .. و قال بشكل واضح وصريح إن المسألة مش بتخص مصر بس لكن هي مشكلة بتأثر على سلاسل الإمداد العالمية كلها.. يعني ببساطة، الملاحة في قناة السويس والبحر الأحمر بقت أزمة دولية وده يخلينا نحتاج تضافر الجهود مع دول تانية عشان نحافظ على استقرار القناة.
طيب إيه البدائل اللي بيتكلم عنها عز العرب لحل أزمة تراجع ايرادات قناة السويس؟
الأول قال إننا ممكن نستثمر أكتر في قطاع السياحة ونشتغل على جذب السياح بشكل أفضل وان السياحة دايمًا كانت مصدر مهم للدخل القومي ولو فعلاً ركزنا على تطويرها وتسهيل الأمور للسياح ممكن نعوض جزء من تراجع دخل القناة.. كمان قال ان فيه فكرة دعم تحويلات المصريين بالخارج واللي بالرغم من إنها سجلت انخفاض طفيف خلال السنة المالية اللى فاتت ، إلا إنها في ارتفاع ملحوظ في الفترة الأخيرة.. وأكد ان ده بيدينا أمل إن زيادة التحويلات دي تكون جزء من الحل خصوصًا لو شجعنا المصريين في الخارج على دعم الاقتصاد أكتر
طب وبالنسبة لقرض الصندوق والخلافات اللى بدأت تظهر حوالين المدى الزمنى لتطبيق الاصلاحات المتفق عليها مع الحكومة المصرية؟
فيما يخص قرض صندوق النقد الدولي، عز العرب كان ليه وجهة نظر مهمة .. هو بيشوف إن سرعة تنفيذ الإصلاحات ممكن تكون غير صحية لو تسرّعنا فيها ولازم يكون في ثقة متبادلة بين الحكومة وصندوق النقد… وده يمكن نفس اللي الرئيس السيسي اتكلم عنه لما قال إنه محتاجين نراجع موقفنا مع الصندوق وناخد القرارات اللي تتناسب مع تحدياتنا خصوصًا لو كانت هتؤدي لضغوط على الناس مش ممكن يتحملوها
وايه الوضع الحالي للنقد الأجنبي ؟
عز العرب شاف إن الوضع النقدي في مصر “ما زال متوازن” بفضل استقرار العرض والطلب على النقد الأجنبي.. بس في نقطة مهمة نبّه عليها وهي إن لو الطلب على الدولار زاد عن العرض من غير أي تحرك في السعر ده ممكن يسبب مشكلات حقيقية.. يعني ببساطة لازم نحافظ على توازن بين العرض والطلب وإلا ممكن نلاقي ضغوط على الاقتصاد.
وعن توقعاته للتضخم عز العرب شايف إن في أمل للتراجع مع الوقت خصوصًا بعد التعديلات الأخيرة في أسعار الطاقة.. وده يمكن نفس السبب اللي خلانا نشوف ضغوط واضحة في الفترة اللي فاتت لإن التعديلات دي كانت أسرع من قدرة الاقتصاد على التحمل..عز العرب بيشوف إن البنك المركزي بيحاول يحافظ على معدل فايدة إيجابي يوازن بين التضخم والفوائد الرسمية لكن ده برضو تحدي كبير ومحتاج إدارة دقيقة.
في النهاية، تصريحات عز العرب بتركز على أهمية الإدارة الحذرة للأزمات والتعاون الدولي للحفاظ على استقرار الأوضاع الاقتصادية..وكامن استحداث بدائل تعوض تراجع إيرادات قناة السويس والحلول اللي ممكن تساعد في السيطرة على أزمة الدولار وشايف ان الرؤية الاقتصادية الجديدة بتفتح باب الأمل لكن الطريق مليان تحديات
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
