لو انت منهم.. شوف الحكومة هتعمل إيه مع أصحاب عدادات الكهرباء القديمة

الحكومة حاليا بتقوم بخطة لاستبدال العدادات الميكانيكية القديمة لعدادات مسبقة الدفع من اللي هيا أبو كارت، ياتري القرار ده هيمشي إزاي ومين اللي هيدفع تكلفة العدادات الجديدة

وزارة  الكهرباء دلوقتي شغالة في اكتر من اتجاه عشان تضمن استمرارية تشغيل الكهربا وميكونش فيه قطع تاني للكهرباء في فصل الصيف اللي جاي، وعلشان ده يحصل الدولة حاليا قامت باجراءات كتيرة جدا علشان تأمن التغذية الكهربائية، واحد من الخطوات دي هيا استبدال العدادات القديمة بعدادات مسبقة الدفع جديدة واللي معروفة باسم العداد أبو كارت، خصوصا أن في وقائع كتيرة جدا بتحصل دلوقتي لسرقة الكهربا من وراء العدادات القديمة وللاسف النوع ده من العدادات صعب جدا أن يكشف وقائع السرقة.

طيب اية اللي بتعمله الوزارة علشان تغير العدادات القديمة لعدادات مسبقة الدفع؟.

وزارة الكهرباء والطاقة المتجددة ممثلة في جهاز تنظيم مرفق الكهرباء وحماية المستهلك، حدد مدة هتنتهي بعد 5 أيام لتغيير العدادات القديمة بعدادات جديدة مسبقة الدفع، وده مش لكل الناس ولكن للناس اللي اتأخروا في عن دفع الفاتورة لمدة شهرين.

مش بس كده  ده كمان جهاز تنظيم مرفق الكهرباء حدد غرامة 7% للناس اللي اتاخروا في سداد فواتير الاستهلاك لمدة 30 يوم، ودي واحدة من الخطوات لمواجهة تأخيرات تحصيل مبالغ الاستهلاك الشهري خصوصا أن الدولة بتحاول بكل الطرق أنها تقضي علي ظاهرة تاخر تحصيل الفواتير .

طيب ازاي وزارة الكهرباء والطاقة المتجددة هتحصل ثمن العدادات الجديدة مسبقة الدفع؟.

وزارة الكهرباء كشفت عن صدور قرار من مجلس الوزراء بوقف تقسيط قيمة المقايسة وسعر عدادات الكهرباء الكودية على كارت شحن العداد لمدة 24 شهر ، وطالبت المتقدمين من أصحاب المبانى المخالفة  لتركيب العدادات الكودية بالدفع نقدا وده بهدف سرعة تحصيل مستحقات شركات التوزيع بشكل فوري.

الإجراءات اللي اخذتها وزارة الكهرباء والطاقة المتجددة هدفها زيادة التحصيل النقدي خصوصا إن الوزارة مديونة برقم كبير لوزارة البترول والثروة المعدنية والخاص بتمن شحنات الغاز الطبيعي والمازوت اللي وزارة البترول بتتعاقد عليهم لتشغيل محطات توليد الكهرباء واللي كانوا بنسبة كبيرة السبب في تاخر وزارة البترول في التعاقد علي شراء شحنات غاز جديدة لتشغيل محطات توليد الكهرباء .