هو ايه حكاية الضيف الجديد في الاقتصاد المصري وازاي مصر هتكسب 43 مليار دولار لو شدت حيلها في المجال الواعد والجديد.. كل التفاصيل هنتابعها في التقرير ده خليكم معانا للآخر
العالم كله دلوقتي بيتسابق علشان يسيطر على الاقتصاد الجديد اللي هيقود كل التجارة والصناعة وكل المجالات الاقتصادية في الفترة الجاية وهي امتلاك تكنولوجيا المعلومات والذكاء الاصطناعي واللي كل دقيقة بيحصل فيه تحول هائل يقوده الذكاء الاصطناعى واللي بقي بوابة لفرص اقتصادية وتنموية واسعة لكل الدول ومفيش نشاط اقتصادي في الأيام الجاية هيخلوا من تكنولوجيا الذكاء الاصطناعي واللي قلبت موازين التجارة والتصنيع والشحن والتعهيد والزراعة ودخلت في كل المجالات ودا معناه انقلاب كبير وتسونامي هيغير شكل الاقتصاديات العالمية واي دولة هتتخلف عنه هيفوتها كتير ومش هيكون ليها مكان في عالم واقتصاد جديد حرفياً.
لكن في نفس الوقت الطريق مش مفروش بالورود واي حد يقدر يمتلك تكنولوجيا الذكاء الاصطناعي والرقمنة ودا لأن الموضوع كبير جدا وبيحتاح لتقنيات حديثة ومؤسسات واكاديميات علمية وكفاءات بشرية وأمن سيبراني واستثمارات بالمليارات وفي نفس الوقت الدول مش هتقدر تتخلف عن النظام العالمي الجديد في الاقتصاد.
طيب مصر فين من التكنولوجيا الجديدة دي؟
شوف حضرتك مدير عام مايكروسوفت مصر، ميرنا عارف، ردت على السؤال دا وقالت إن العالم بيسابق الزمن دلوقتي لبناء مستقبل تقوده قدرات الذكاء الاصطناعي، وإن التحول إلى اقتصاد الذكاء الاصطناعي في مصر بيتطلب تعزيز الشراكات مع شركات التكنولوجيا العالمية، وإنشاء مراكز للابتكار لتشجيع التعاون بين الأكاديميين والمؤسسات والشركات الناشئة، لخلق بيئة محفزة للأفكار ويعزز ثقافة الابتكار.
وقالت مسؤولة مايكروسوفت ان الذكاء الاصطناعي بيُعتبر من أهم التقنيات اللي بتعيد تشكيل العالم من حولينا وهيساهم في تقديم حلول مبتكرة للتحديات اليومية ودا غير تعزيز النمو الصناعي والاجتماعي بشكل غير مسبوق وفي مصر الدراسات توقعت ان الذكاء الاصطناعي هتساعد في زيادة الناتج المحلي الإجمالي بحوالي 43 مليار دولار بحلول سنة 2030، بما يعادل 7.7% من الاقتصاد الوطني.
والمسؤولة شايفة أن مصر بتعتبر وجهة جذابة للتكنولوجيا والذكاء الاصطناعي بسبب توافر مجموعة متميزة من الشباب الموهوبين المتحمسين للابتكار وقادرين يصنعوا الفارق ويستوعبوا التطور السريع في تكنولوجيا الذكاء الاصطناعي ومصر مليانة مواهب متقلقش عن اللي موجوده بره ودا راس المال الحقيقي لاي دولة بتدور على التطور التكنولوجي ودا بجانب التركيز الاستراتيجي للحكومة على التحول الرقمي والاستثمار في تطوير البنية التحتية التكنولوجية يعزز من مكانتها كمركز رئيسي للتقدم التكنولوجي.
مايكروسوفت عشان عارفة إن مصر دولة كبيرة وعندها مواهب تقدر تقود الثورة التكنولوجية الجديدة قررت تشتغل في مصر بقوة وعملت شراكات استراتيجية مع القطاعين العام والخاص زي التعاون مع وزارة الاتصالات ووزارة الشباب عبر مبادرة "طور وغير"، اللي يتدرب أكتر من 2.5 مليون شاب في 500 مركز ودا غير التعاون لتفعيل مبادرة "أجيال مصر الرقمية" لتجهيز القوى العاملة بالمهارات اللازمة في عالم الذكاء الاصطناعي".. يعني مصر قادرة وعندها ملايين الشباب المصري العبقري الي يقدر يقتحم ويقود قطاع ومجال جديد بيتعتبر منجم لمليارات الدولارات.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
